 |
Questa pagina a no l'è stæta corretta. | |
9.
Signorscì! Là, sensa ûn citto,
Sensa pesti e da pestâ,
Se fa schêua con gran profitto,
Se provvedde da mangiâ,
E se rende a-a societæ
Di boin figgi e di boin poæ.
10.
Là s'impara, là s'imprende
Guadagnäse da mangiâ,
Là s'inizia, chi gh'attende:
In te l'arte do mainâ;
La s'impiega in t'ûn bon fin
A caitæ di çittadin.
11.
Mi no façço pe vantalo
Nè accatame o sò favô;
Ma quest'ommo pêuan ciamalo
Garaventa o Redentô;
E prestaghe quell'aggiûtto
Ch'o se merita in te tûtto.
CANSONETTA
Quande spunta ûnn-a zoenotta
D'êuggio vivo, ûn pö brûnotta,
Ch'a no n'è secca nè grassa,
Ch'a l'ha i vazi in sciâ terrassa,
Tûtto o sangue a fa smangiâ.
Donna bælla fortûnâ!
