 |
Questa pagina a no l'è stæta corretta. | |
4.
Là, tra i sbirri e tra e manette,
Quello bravo e bon figgiêu
De Questô, con parollette
Che toccavan o mæ chêu,
O firmava a garanzia
Do mæ allogio in sant'Andria.
5.
In te quella vea sentinn-a
Do delitto e d'ogni mâ
M'iniziava ne-a rapinn-a,
Ne-a grand'arte d'arröbâ,
Ne-o saveì, quande se sciorte
De de lá, cacciä zû e porte.
6.
In che moddo son sciortïo
No ve o vêuggio manco dî,
Comme vive l'ammonio
Da voiatri o poeì capî;
Ma confesso che mentr'ëa
In sce l'orlo da galëa;
7.
O sciô bravo Garaventa
O m'ha dîto: « Ferma lì!
Faccia brutta, anima tenta,
Ti ghe vêu vegnî con mi?
Se ti vegni lazzû in fondo
Te mettiö a l'önô do mondo. »
8.
E piggiandome a braççetto,
E locciando o so baston
O me tiava zû a passetto
Verso la[sic] nave Redenzion;
Verso a nave che in coscienza
Pêuan ciamala Provvidenza.
