Pagina:G. Peragallo - Poesie - 1870.djvu/11

Da Wikivivàgna

Sci che vêuggio ciù soffrî
Questa vitta! l'é træ nêutte
Che gh'appaegio e meje chêutte
Tûtta a seja e lascio a-o fêugo,
E ch'o vegne no gh'é lêugo:
No gh'é lêugo de mangiâ
Unn-a cosa assaxonâ;
Son pastetta, son inguento,
E lê poi per complimento
O vegniä c'ûn pâ de morti.....
Maledetto i beccamorti,
Maledetto chi i eleze,
Maledetto chi i proteze,
Maledetto i caudatäi,
Maledetto i mandatäi,
Maledetto drappi, bare,
Çimbali, organi, chitare,
Maledetto, maledetto......
Ma ve o là c'ûn cataletto.
Sci, nèh cäo, ti l'hæ attrovôu?
Miæ che morto fortûnôu!
Senza ti, chi sa, de votte,
O l'aviæ piggiôu de botte,
O, con questa aietta crûa,
Acciappôu quarche puntûa;
E se mai son costippæ,
Pövei morti, gh'êu caitæ.
Pä ch'o peize; o l'e ûn boccon,
Se no sbaglio, bellebon;
Vegni, cäo, portimeo sciù,