 |
Questa pagina a no l'è stæta corretta. | |
la tentaciom e deliberaciom cognossandolla frai Zoanin per sprito de proffecia, si retornà deprezente a caza, e iustrao che o fo, o ihamà a ello lo novicio, e ge disse che o varea[sic] che o se conffesase. E si ge disse per ordem tuta la soa tentaciom secondo che Dee g'avea revellao, e pöa o ge disse: "O figör carissimo, inpersochè ti m'ai aspeitao e che ti non t'ê vosuo partî sensa la mea benissiom, Dee t'a faito questa gracia, che ti non insirai mai de questo Ordem, ma con la gracia de Dee ti morai in l'Ordem." Alaora lo novicio fo conformao in bona vollontae e romaze in l'Ordem e fo bon e santo frai. E tute queste cosse o me le recointà frai Bergolino*.
E lo dito frai Zoanin era um homo de animo reposso e alegro e de rero parllava, e era homo de grande oraciom e de devociom e speciamenti depoî li matin o non retornava mai a la cella, ma stava in zexa fin a di; e stagadoge[sic] una vota in oraciom depoî li matin, si ge aparsse lo Angero de Dee chi ge disse: "Frai Zoanin, e' l'è conpia la toa via, lo qua za longo tenpo tu ai aspeitao; e però mi te denoncio da parte de Dee che ti demandi quella gracia che ti vöi. E anchora e' te noncio che ti elezi qua ti vöi, ò um di de peña in prugatörio, ò sete di de peña in questo mondo." E frai Zoanin elezè pu tosto li sete di de peñe in questo mondo cha um di de penna in prugatörio, e subitamenti ello se amarotì de diversse infirmitae, e ge vegne la freve grandementi, e uña peña in le main e in li pê, e mâ de fianco e monti atri mai: ma quello chi ge fava pezo si era um demonio chi ge stava davanti e chi ge mostrava um grande fasso de carte scripte de tute le peccae che ello avea faito in penssao, e dixeivage: "Per queste peccae che ti ai faito con lo penssâ e con la lengoa e con le övere, tu si ê danao a lo perfondo de lo infferno." E ello non se arecordava de nissum bem che ello avesse faito, ni che o fosse in l'Ordem, ni che o ge fosse mai staito, ma o penssava pu de esse danao, cossì como ge dixeiva lo demonio. E quando e' l'era demandao como o stava, o respondeiva: "E' stago mâ, perssochè sum danao". E vegando questo li frai, e' mandàm per um frai antigio lo qua avea nome frai Mathê da Monte Rubiano. E vegnuo che fo dito frai a questo lo setimo di de la soa tribulaciom, e' si lo saruà e demandàge como ello stava. E ello respoze: "E' stago mâ, perssochè som danao." Alaora frai Mathê ge disse: "Non t'arecordi-tu, che ti ê monte vote conffesao da mi, e mi si te asorvei intregamenti de tute le toe peccë? E non t'arecordi-tu che ti ai servio a Dee monti agni in questo Ordem? Apresso, non t'arecordi-tu de la mizericordia de Dee e non crei-tu che o leve tute le peccae de lo mondo? E non crei-tu che Ihu. beneito Sallvao pagà per noi e ne rechatà per infinito prexo? E però agi bona speranssa, che per certo tu ê salvo". E per tuto quello di durà la tentaciom, perssochè l'era conpio lo di de la soa purgaciom, e la tentaciom se partì e vegne la consolaciom.
E con grande alegressa frai Zoanin disse a frai Matê: "Inperochè ti t'ê afatigao e anchora perochè l'ora è tarda, e' te prego che ti te vagi a possar." E frai Matê non lo voreiva lassâ, ma pu finarmenti, a soa instancia, o se partì da ello e ze a possar. E frai Zoanin romaze soreto con lo frai chi lo serviva. E goardà e vi vegnî Ihu. beneito con grande splendô e con asessiva caritae e suavitae de cör, como o g'avea promisso de apareize* un'atra vota quando o n'avesse mao bezögno e si lo sanà perffetamenti de ogni infirmitae. Alaora frai Zoanin con le main zointe regracià Dee che con bona fin e' l'avea detreminao lo so viageo de la prezente mizera vita, e reize la soa anima in le main de Xe., e con quello o ze in vita eterna e lo qua lögo e' l'avea dexirao longotenpo. E sepellin lo so corpo [nel luogo della Penna di Santo Giovanni].
A lozo de Xe. lo qua è beneito in seculla secullorum con tuti li angeri Amen.
46.
In la provincia de la Marcha, depoî la morte de san Francescho, o fo doi frai in l'Ordem, de li quai l'um avea nome frai Umille e l'atro frai Pacifficho; li quai fon homi de grande santitae: e l'um, soè frai Pacifficho*, stava in lo lögo de Suffiano e lì morì, e l'atro stava in um atro lögo lonzi da ello. E como piaxè a Dee, frai Pacifficho stagando um di in oraciom in um lögo solitario e tuto daito a Dee, o vi l'anima de frai Umille andâ drita in cel, senssa nissum inpaiho; e in quella hora a s'era partia da lo corpo.
E l'avegne dapöa, che de lì a monti agni questo frai Pacifficho, chi era romazo a quello lögo unde lo so frai era morto. E questo fo a requesta de li segnoi de Bonforte*, e' si canbiàn quello lögo in um atro; e, inter le atre cosse, elli stralatàm le reliquie de li santi frai chi eram morti in quello lögo. E vegniando a la sepotura de frai Umille, so frai Pacifficho si preize le soe osse e si le lavà de bon vin e pöa o le misse in una toagia biancha e con grande reverencia e devociom o le baxava pianzando; de che li atri frai se ne maravegàm e non preizem bom exenprio de ello, inperochè seando ello bom e de grande santitae, o parea che per amô sensuâ e secullâ ello pianzesse lo so frai, e che o mostrasse a le soe relliquie pu devociom cha quelle de li atri frai chi eram staiti de non men santitae cha frai Umille, e chi eram cossì degne de reverencia como le soe.
E frai Pacifficho, cognossando lo penssamento de li frai, si li vosse contentâ, e umillementi o ge disse: "Carissimi, non ve maravegai se o faito tanto honô a le osse de mê frae e pu cha a le atre; e como voi ve crei, e' non l'o faito in tratao per amô carnâ; ma sapiai che quello che o faito, e' l'o faito che quando lo mê fraello passà de questa vita, seando mi in oraciom in lo lögo dezerto e remoto, e' vi la soa anima andâ drito in cell; e inperssò e' sum certo che le soe osse seam sante e si dem esse in pareizo. E se Dee m'avesse conservao tanta gracia e certessa de li atri frai, e' avereiva faito a le lor osse quella mesma reverencia che e' o faito a lo mê dilletissimo frai frë Umille." Per la qua cossa vegando li frai la soa santa e devota intenciom, e' restàm de ello contenti, e si loàm messê Ihu. Xpe., chi mostrava cossì maravegoze e glorioze cosse a li söi santi frai.
A lozo e a gloria de Ihu. Xe. e de la soa santissima Maire santa Maria.
