Pagina:Eneide 1895.djvu/110

Da Wikivivàgna

1
E sciugandose i œuggi, â direzion
Ö l'ha misso de Cuma, i bastimenti
Destrezzando co-a veia e cö timon
Fando forza de remme e sacramenti,
Che in t'un lampo, pe usâ quest'esprescion,
Se ghe trœuvan addosso e immantinenti,
Ognidûn bœutta l'ancôa* e se destriga
A ormezzäse dappresso e in sce ûnna riga.

2
E li zû a rubatton, lasciæli andâ,
I zuenotti, animæ dall'allegria,
Tûtti in tæra, chi ö pitto a preparâ,
Chi pe l'ægua da beive o a fâ razzîa
De gallinne e verdûa pe fâ ö disnâ,
Chi a rachœuggie buscaggie, e chi s'asbrîa
C'ûnna famme da lôi, co-a borsa pinn-a,
A cercâse* un pittin de pantalinna.