 |
Questa pagina a no l'è stæta corretta. | |
de buffonate da figgiœu, e me divertiran infinitamente. Me pâ zà de sentîri, e de véddene un-na meza dozen-na per ro manco.
Gir. Non gh’è piaxei ciù grande à sto mondo, e ve conseggio à mariâve ciù presto che sæ possibile.
Fab. Benissimo, voî me ro conseggæ?
Gir. Sença dubbio, non poei fâ cosa mêgio.
Fab. Veramente son consolao de sentî, che voî da bon amigo me dæ questo conseggio.
Gir. Se pœu savei chi è questa person-na, con ra quæ ve vorei mariâ?
Fab. Giaçintin-na...
Gir. Giaçintin-na? quella figgia de bon-na graçia, chi và acconça à ra granatera con tante moschette, e che tutti ri zovenotti ghe fan ro cascamorto?
Fab. Sì.
Gir. Figgia dro sciô Tiritoffolo, e dra sciâ Ortensia?
Fab. Giusto quella.
Gir. E sœu dro sciô Ormondo spadaçin famoso, dito per sorve nomme taggia e squarça?
Fab. Sì, Signor.
Gir. Che gran fortun-na! (a parte ) mi non vœuggio cæti.
Fab. Cose ve pâ?
Gir. Ottimo partío. Mariæve presto, spedîve.
Fab. L’aggê trovâ à propoxito?
