 |
Questa pagina a no l'è stæta corretta. | |
E mezzan despixonôu,
Sciortî fêua do semenôu,
Sensa intrâ però in matëia
Perchè a saeiva ûnn-a mattëia...
Zacchè mi no ghe pretendo,
Ché de fluidi no m’intendo,
Né de solidi, e d’ûmoî,
Coscì lascio a-i professoî
Discorrîne, ché no posso,
Pigmeo, fâ da colosso,
E domando, per lo meno,
Scûsa a Ippocrate e a Galeno
Se, zazzûn di sò aforismi,
E mancante de grecismi,
Aoa vaddo a profanâ
L’arte bella do sanâ
E me spaccio per Magnifico;
Ma vegnimmo a-o gran specifico,
M’armo primma d’ûn bon bacco,
E me metto l’elmo, e o giacco.
O rimedio de Le Roâ
Mi no-o ciammo ûniversale,
Manco o diggo micidiale,
Comme tanti o fan passâ,
O n’è manco cosa nêuva.
