 |
Questa pagina a no l'è stæta corretta. | |
9
Ferippo è dri Carrega ro Carzœu,
Dra Zoventù ro spegio,
Modesto comme un Angero dro Çê:
In ro tratto ciù dôçe che l'amê:
Fra ri boin un dri megio:
Con tutti eguale, sccetto, e de bon cœu:
Amante dra giustiçia e dro dovei,
Ommo de bon parei.
In fin quelle virtù son tutte uníe
In Lê, che tanti s'han fra lô spartíe.
10
Da sta coppia sì bella e così cara
Mira là tutte uníe,
Ordinæ comme in longa procession
(Numera, se ti pœu, quante moæ son)
Añime zà finíe,
Che se ne vegnan zù con longa gara
De tempo in tempo e d'in etæ in etæ
In ra nostra Çittæ,
Donde figgi da figgi nasceran
L'un dopo l'atro, e via de man in man.
11
Chi dra Patria custode assæ zelante,
Comme un atr'Argo attento,
Con intençion cæra lampante e pura
De ben guardâra piggerà ra cura;
Chi pronto à ogni çimento
Sempre se mostrerà forte e costante:
Con ro conseggio e con ro bon parei
O se farà varei.
Ognun per fin sarà famozo in terra,
In ogni congiontura, in paxe e in guerra.
