Pagina:Chittarin 1772.djvu/118

Da Wikivivàgna
RISPOSTA DRO SIGNOR

ABBATE CONTI
À RO SIGNOR
STEVA DE FRANCHI.

SONETTO.

Che Foggetta, che Rossi, che Cavallo?
Steva De Franchi, à dísera in Zeneize,
Sei ro primmo Poeta, e primmo arneize,
Ch'agge montao ro Pegazeo Cavallo.

In Parnasso gh'è zà ro Pedestallo,
Donde Apollo re vostre rimme appeize
O vœu che sæan scrîte ben desteize,
E o v'erze statua dro ciù fin metallo.

Ma de noî doî, à confessâra sccetta,
Gh'hei peccao à lasciâ ro primmo posto.
E chi ve pœu levâ sta bella incetta?

Comme gh'è fra Stoppin [1] e l'Ariosto
Defferenza, e fra torcia e canderetta,
Così gh'è fra noî doî, se à voî m'accosto.

  1. Ro famoso meistro Stoppin, poeta latin maccaronico, assæ cattivo, che o no merita de cazze in man d[']un galantommo.