Pagina:Çittara zeneize 1745.djvu/80

Da Wikivivàgna

VIII.


Per fâme ben vorei, per fâme caro
A questa Coppa d’oro de Zaniña,
Me crao che in peççi comme ra tonniña
Me lascerǽ redue, l’averǽ caro.

No m’avereiva in breiga ni descaro
Beive per doçe l’ægua dra mariña;
Piggerǽ per siroppo de cantiña
L’aloæ’, quand’o foisse assǽ ciù amaro.

Corrirǽ dent’re spiñe a pê descaçi:
Me caccerǽ int’ro fœugo bello nuo:
Farǽ, se poesse, zuramenti fâçi:

Piggerǽ patto a vive nuo e cruo,
Pù che a no me vózesse lê ri câçi
Questa cara Zaniña de velluo.