Pagina:Çittara zeneize 1745.djvu/312

Da Wikivivàgna

V.
Se questa è neive chi ven da ro Çê,
Comme a ra sò giancheçça vei me pâ,
Comme diavo ghe pœu drento stâ
Ro fœugo, chi me bruxa sì crudê?

Se l’è un marmaro gianco drito in pê,
Comme ra sò dureçça pœu mostrâ,
Comme diavo fâlo a caminâ,
E a tirâ frecce comme un barestrê?

Ma se l’è donna pù de carne e d’osse
In terra, comme a pâ, ben ho çerteçça,
Che vei ciù bella cosa no se posse:

Che l’è ciù bella dra mesma belleçça;
E ciù bella sareiva, s’a no fosse
Ciù dura ancora dra mesma dureçça.