O Cicciollâ 1930/O Tortelasso
| ←A l’è coscì...!! | O Cicciollâ de O Tortelasso de Nicolò Cezare Garon |
Sonetto→ |
| lasciòu inalterâ a grafia do "Cicciollâ". |
O Tortelasso
Voei conosce, mae câi, un bocconetto
Da mangiâse da tutti, a tutte e ôe,
Sutti, cado, a bon prexio, liscio e sccietto,
Che i scignoi n’o rifiutan a e so tôe?
Bon in ogni stagion, in grasso, in magro,
Staeto sempre trovôu, da chi l’attasta,
Giusto de döze, ne duçe, nè agro,
Umeo e delicôu ciù ancon che a pasta?
Ve mâveggiesci, se vedesci quanto
Se ne rende fra l’anno chi a i nostrae
E ai Piemonteixi ne o Venerdi-santo!
Ve o diggo presto, ma no ve o scordae:
Anzi ve o daggo in grosse pöle scritto:
O l’è o gran Tortelasso di Casciae.