O Cicciollâ 1930/Egloga Pescatoria

Da Wikivivàgna
O Cicciollâ
Egloga Pescatoria
lasciòu inalterâ a grafia do "Cicciollâ".
[p. 33 modifica]
ANONIMO


Per la Solenne Accademia
Alle glorie di Dio e di Maria V.
Nel felice ritorno del Ser.mo Dom.o in q.ta Città
Celebrata nella Chiesa di S. Ignazio il 1 Marzo 1749
Presente S. E. il Sig. Massimiliano Saoli Governatore

Egloga Pescatoria


In questo cosci bello e coscì allegro
Da tûtti sospirou felise giorno,
Signor, di nostri acquisti me rallegro:

E se rallegra ao vostro bon retorno
E giûbila a Sittae, ch’é tûtta in foego
E rimbomba d’evviva ogni contorno,

E, con feste continue in ogni loego,
Tûtti a rëo d’onoave an per incetta:
Fin ste belle giornae fan o so sfoego.

Mi ascí pescou, che son de sta ciazzetta,
Appenna sei vegnûo, tutto contento
O lasciou lammi, rae, canna e barchetta,

E ve so dî ch’un’oa n’é parsa sento,
Perché senza de voi e in tanti guai,
Che a mensûnavei solo me spavento:

Gente armâ drento e foea, assedii, spai,
Unna cá rotta e l’atra chi roinna,
Miseie da per tûtto e vitti cai....

[p. 34 modifica]


Atro che andâ sercando in ta mainna
L’ostrega, o caagollo, o zin e a gritta
E o pescietto de scoeggio e de l’ainna.

Vorreimo tosto (e se a tegnimo sitta)
Ciantâ lí o gosso e tûtti i nostri arneisci
Pe fâ ûnna leva e mette in sarvo a vitta.

Ma, contemprando i nostri dì má speisci.
Segnö, pietae, dixeimo, ai nostri stenti,
Carma ao nostro doo de tanti meisci.

Vergine, defendei quelli innocenti,
Che ciû de noi, per tûtta sta Rivëa,
Soffran danni, destrasci e robamenti.

Le, Reginna Cremente e moae vëa,
Domandò miseicordia, a ne l’ottenne
E vense a paxe a colorine a cëa.

Nomma a rendea compía e ciû solenne
Mancava a noi l’amabile Governo,
Degnamente lodou da e brave penne.

Lonxi, o guaera da noi, fûia d’Inferno,
Che o nostro Governou ne porta in fronte
Quete serenna a o to spavento eterno,

E a lodave, Segnö, tûtte son pronte,
Libere da sorpreisa, assedio e spoeggio,
Rivee, sittae, valle, collinna e monte.

Ma! che, lontan da o mae diletto scoeggio,
Veddo che squexi a me precore a mente,
Chi me feeiva dî cose e non voeggio....

Voi che andae da levante e da ponente,
Pesci gentî, contaeghe in cortescia
Se mai fû coscì allegra a nostra gente.

Viva nostro Segnö; viva Maria:
Viva a nostra Reprûbica de Zena:
Sta guaera maledetta a l’è finia!