O Cicciollâ 1930/Dui tramönti
| ←A torta de seixo | O Cicciollâ de Dui tramönti de Gioxeppe Cava |
Pasqua→ |
| lasciòu inalterâ a grafia do "Cicciollâ". |
Dui tramönti
- O sô, verso ponente, adaxo adaxo,
Se ne và in mezo ä nûvie d’öu lûxente:
Sotto quello de lûxe ûrtimo baxo,
O mä calmo semeggia ûn lago ardente.
A lenti ciocchi, o campanôn de Paxo
Annönzia a fin de ûn essere vivente
E pä che, a cianze insemme o triste caxo
E anime o invite da pietösa, gente.
Dui tramönti! Un fra e lagrime e o dölöre
De pövia gente, da-o destin provae,
Che, per a forza viva de l’amöre,
Vorrïen cöntende a-a morte ûn figgio o ûn frae:
L’ätro in t’ûn çercio aççeiso de splendöre,
Scimile a-a gloria de l’Eternitae!