O Cicciollâ 1930/A torta de seixo
| ←Malinconie | O Cicciollâ de A torta de seixo |
Dui tramönti→ |
| lasciòu inalterâ a grafia do "Cicciollâ". |
Torta de seixo — morbida e bunn-a,
Boccön speciale — da mae Savunn-a,
Da-o fêugo vivo — chêutta, indorà
E con bon êuio — condizionà.
Canto a tò lode —, a tò bontae,
Che han reiso celebri — tanti tortae.
Cantà te vêuggio — con a parlata
Da brava gente —, dove ti è nata,
Perchè a fragranza —, che a ven da ti,
Se spuse a-o sêunno — do nostri « scì ».
Rigordo a Monica —, a Pasqualinn-a,
Manin a Dûxe —, a Pellegrinn-a,
Penso a-i Pastelica —, penso ai Lazzae,
A-e törte cäde — che gh’ò mangiae,
E sto rigordo — me tïa sciû o chêu,
Me descia a göa — comm’a ûn figgiêu.
Veddo a fascinn-a — che zà s’assende
E a pasta liquida — che a se destende
Drento do testo — con êuio fin,
De sccetta oïva — veo verzellin.
A sciamma bella — ne-o turno a gïa,
A pasta a bugge —, a ven rustïa,
O giano seixo — in öu se cangia,
Manda ûn profûmo — che o dixe: mangia!
Sento in te öege — i corpi spessi
Do fëro adatto — a fala in pessi,
Me pâ ûnn-a mûxica, — ûnn-a cansön,
Che a predisponn-e — a-o bun boccön.
Lèsti, ûn spelinsego, — surva, de peive
Ghe azzunze gûsto —, o invita a beive
Quello vin gianco — de nostre vixe,
Che con a törta — tanto se dixe;
Anzi, sostegno — che son creae
Pe funde in ûnn-a — tre gran buntae:
Quella do seixo —, dell’êuio fin
Con o pessigo — do nostralin....