O Cicciollâ 1930/A scoverta dell'America
| ←Sonetto | O Cicciollâ de A scoverta dell’America |
I Casciae→ |
| lasciòu inalterâ a grafia do "Cicciollâ". |
A scoverta dell’America
- A l’è chie, a l’è là, miê là che a spunta
Queila tëra, caxon de tanti stenti:
Miê ben de fronte, che se screuve a punta,
A truvâla ghe vuëivan i talenti
Do nostro capitan.... Miê che buscaggia,
Che cianüa se destende ai quattro venti!
U mâ, che quasi sempre o paiva in raggia
Contro da nostra nave, o s’è abbonïo
E o pâ che o baxe o pü che o lecche a spiaggia.
O vento o l’è de puppa e regaggïo;
Pa che a têra a s’accoste a corpo d’euggio....
Ghe semmo â fin.... Sê benedetto Iddio!
Se a duäva ancon un po’, che brutto imbreuggio!
Ringraziemo o Segnö che, pe o coraggio
Do capitanio, emmo schivou sto scheuggio.
Allegri cameadda! che dell’aggio
N’emmo ben ciccöu! Ah! quante votte
Se credeiva persa a nave e l’equipaggio.
A forza de bordezzi e de giavotte
Emmo schivou d’ese boccon di pesci,
Che ne stavan d’intorno a frotte a frotte,
E, za tutti in ta pansa che saiesci,
Se o capitanio o no ve fàva cheu,
Che spesso ëi come pali e ciù che nesci.
O seu curaggio esprime o no se peu:
Ninte o temme, di peighi o ne se cüa,
O va donde o ghe piaxe e donde o veu....