O Cicciollâ 1930/A festa de Santa Lûçia
| ←Voxe antiga | O Cicciollâ de A festa de Santa Lûçia |
O pescio-can-gatto→ |
| lasciòu inalterâ a grafia do "Cicciollâ". |
Sciû pe-a stradda soleggià,
Che a se parte dä Torretta
E a costezza o nostro mâ
Finn-a a vëgia cappelletta
Dedicà a Santa Lûçia,
O l’è ûn mondo d’allegria.
A l’é a festa di figgêu,
Che l’aspëtan ben de coêu:
Cöran, crian, se dan ronsoìn....
E de votte scopassoìn;
E trombette fan sûnnâ
Che pä d’ëse in carlevà.
In sce tûtti i carrettin
O gh’è tanti gingillin:
Gh’è e Tittinn-e co-a röbetta
E i pastoi co-a cavagnetta,
E-e casette de cartòn....
E i croccanti cö torròn.
I stûdenti co-e bacchette,
I zoenotti co-e ballette
Assimentan e gambette
De ste belle zovenette,
Che ghe van pe demoâse,
Ma fan finta d’arragiâse.
Sciû pe-a stradda soleggià,
Che a costezza o nostro mâ,
O l’è tûtto ûn gran sûnnâ,
O l’è tûtto ûn gran crià,
O l’è ûn mondo d’allegria.
Che o se fa a Santa Lûçia.