O Cicciollâ 1930/A fëa de Santa Luçia
| ←A-o Bosco de Ninfe | O Cicciollâ de A fëa de Santa Luçia |
Soli mi e ti→ |
| lasciòu inalterâ a grafia do "Cicciollâ". |
I
Dä töre de Pancado
pe-a stradda tûtt’in sciù,
’na fila de banchetti,
d’allegra zoventù.
Gh’è tûtta Sann-a, ûn sciûmme
ghe pä, ûn torrente, ûn mâ....,
chi spuncia, chi s’infïa
pe vedde, pe accattâ.
Figgiêu levae da-o nïo
son lì co-e lalle a fëa;
pappà, mammà voentèa
se caccian ’n tò bordello.
Camminn-an tûtt’a fëa
e ognûn o se compiaxe
in te cabbanne in paxe
de vedde o Bambin bello.
Gh’è chi pe fâ o presepio
o accatta tûtt’anchêu:
remaggi e San Giöxeppe,
pastoi, Madonna e bêu....;
Agnelli o accatta e l’aze,
montagne de pappè,
moin, töri e casette....,
va tûtto pe-i sò pè.
Che sciäto, figgi cäi!
Sentì criâ: — Trombette!
Gh’è chi de ciappellette,
gianduiotti, tambûi,
balloîn che van all’aja...! —
Ah, pe levâ i capriççi
d’in te testinn-e a riççi
ghe vorrièvan di scûi!
Oh, mia chi ’sti battosi
che cà-do-diäo te fan!
stordlscian co-e scigoe,
a-i spari mettan man.
Cominsa ’na battaggia,
sätan bombette a-i pè;
che crii da ’ste donnette!
scciûppoîn de rïe.... pepèee!
Figgette, staeve all’occio!
attent’a-e vostre spalle....,
pum! l’ho dito? son balle,
son scherzi di monelli.
Ve pessigan e gambe
co-i bambû; ve fan frasche
con o salamm’ a-e masche....;
sorrisetti.... ai ciù belli!