Ms. Ricci 176/Risposta a ro Sig. Giruoemmo Spinnora all'Isora

by Giurian Rosso

←torna a l'endexo

Poesie in lengua Zeneise de Giurian Rosso Risposta a ro Sigr. Giruoemmo Spinnora all'Isora

A ro Sig.r Fransesco Viá.→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

Risposta a ro Sig.^r Giruoemmo Spinnora all'Isora.

Lustris.^o Patron,
Ra cara vostra lettera
Con re tré doppie, e cetera,
M'ha feto in concrusion
Cognosce ch'ogni di vuoi fé da vei,
Quande ve ghe mettei,
E questo perchè vuoi
In somma no puoei stá,
Che non ne favorí,
E quande no me sei cose mandá,
Vuoi me mandé dell'oro
Per fane vei che vuoi sei un hommo d'oro.
Patron sentime mi,
Fé pu sempre così,
Che così ro Segnó si ve benixe,
Mentre Cecilia dixe
Che per conto dro conto,
Lé sente gusto apponto,
E a l'havereiva a caro,
De non stá ciù a mandaro
Perchè oltre che l'è conto za viegio,

Se così gueri ciù vuoi spesseghé
In mandaghe diné,
In questo moddo chì lié ne stà miegio,
Ma s'a ve l'oe mandá, fuoera re baie,
Besuoegna mi che gh'aie,
Che ghe ro fasse, e ghe ro mette in netto,
Mentre a dixe ch'a l'ha
D'in tro sò liberetto,
E che ben presto a ve ro manderà.
Ma despiaxe assie,
Che pe ro gran da fá
Ch'ho d'in tro litigá,
Non ve posse portá ro conto mie,
Per vegní a baxá li per ogni canto
Quei sassi amati, et honorati tanto.
A ro manco, fra tanto,
Za che no posso in somma desligame,
E vegní li a sciorame,
Ro prego lié, e ra sciá Delia insemme,
Fame un brindisi semme
Quande saran da ló
Gustando quello dose de Varianna
Che così ro Segnó
Ne lascie ben suná questa campanna.