Ms. Ricci 176/Ringratiamento a ro Sig. Gio: Maria Spinnora
| ←torna a l'endexo | Poesie in lengua Zeneise de Ringratiamento a ro Sig.r Gio: Maria Spinnora per un piaxei provisto ad instanza dro sció Carlo Imperiá. |
Information a ro Sig.r Gio: Maria Spinnora→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissimo Patron,
Merlin ro reverendo in l'Odissea,
O Meistr'Omero in tra Macharonea
Dixe ch'unna mattin
Un oxelletto dito ro rétin,
De svo[e]rá ciù dri atri pretendendo,
Per agiuttá in parte
Ra natura con l'arte,
Non troppo de lé mesmo confiando,
Sotto l'ara dell'Aquila aremboù,
Sorva ri atri in Cé fuì sollevoù.
Eccave chì ra fora,
Ch'è reduta in istuoeria, eccave chie,
Ch'in somma chi ra fè, ra fè per mie,
Mi son quell'oxelletto,
Mi son quello rétin picceninetto
Che de fá unna volata oura desidera;
Ma puoe così da lé
non possand'andá in cé,
Per ersese in un sato usque ad sydera,
Per ottegní l'intento onesto, e giusto,
L'Aquila Imperiá piggia in aggiutto.
Se questa votta in gratia
Dro nostro Segnó Carlo Imperiá,
Posse per gratia vostra our'arrivá
Ro povero Giurian
A veise eletto per cascié dro gran,
Se mi metto per vuoi l'inzegno in cascia,
Corpo de chinze lippe,
O che son in Aganippe
Per trenta meisi muoé non se tralascia
D'intoná con Pindanica armonia
E viva, e viva ro sció Gian Maria.
Ma eccame in tro scrive,
Che meistr'Apollo là fin d'Eliconna
Con spirito profetico m'intonna,
Ti non sé fá ro conto
Ti ti é così fuoera de cascia apponto?
Ti non ro sé s'un tò patron si degno,
Ch'in tutto ro paeise
A tutti è si corteise,
Che dri feti a parolla in pegno dà?
S'o dixe d'aggiuttate o ro farà?
Patron tant'in vuoi spero,
Che me pá che ghe sé,
Che m'ho za appareggiá ra segurté,
E za me sento dí deré re spalle
L'amigo porta via tutte re balle.