Ms. Ricci 176/A ro Sig. Zane Fransesco Grimado Capit.o de Sestri
| ←torna a l'endexo | Poesie in lengua Zeneise de A ro Sig.r Zane Fransesco Grimado Capit.o de Sestri |
Ringratiamento a ro Sig.r Gio: Maria Spinnora→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissimo Patron,
Ro povero Giurian
Da puoe che se contrammo pe ra via,
Stà fassando chì in letto ro bozan
Con un pié, e unna gamba arenzenia,
Si houra posso dí che veramenti
In porto m'han portoù cattivi venti,
Mentr'ho contrario a ri mé pié meschin
Un vento nominoù vento servin.
Vuoi sei cos'oeggio dí,
Perch'havei bon giuditio;
Non puoe ciù stá si tacita ra musa,
Che non fasse dro pié ra man l'ofitio,
Chi non puoe fá de ciù merita scusa.
Contenteve patron, ch'a rompicollo
In cangio mié ve mande meistr'Apollo,
E che a nomme commun dro territuoerio
Parnaso fasse un po de tremeluoerio.
Ro resto de sto luoego,
Ra gioia, ra vittuoeria,
Ro sgruoexoro, ra festa, e ro dramaggio
Con ro qua tutto Sestri andava in gruoeria
Cantand'a tutto puoei ben venga Maggio.
Quando ve fessan nostro Capitannio
Non se puoe in somma dí, si non stravannio,
Se con l'occasion penso d'esprimme
L'ato merito vostro in belle rimme.
N'accadde a dì ch'a Sestri,
E per tutta ra valle,
Sent'intonná: sé ro Segnó loudoù,
Ch'inspira ri patroin; beneite balle
Beneite balle chi ghe l'han mandoù,
Chi dixe quest'è un hommo dro Segnó,
Che dre vidoe, e pupilli è protettó
Chi unna pasta de zuccaro ve predica,
E chi per s[c]ciavo eterno se ve dedica.
Ogn'un chì ve desidera,
Ciasch'un se ne va in ere,
Un mé figgietto curto comm'un stecco
Diss'heri barbottando, Tino pêre
Toando benillo o to Dane Panchecco?
Pa mill'anni a zaschun da puoe quell'ora,
Che vegne l'Illustrissima Signora,
Che si degna vittuoeria è ciù aspetá,
Che l'antiga vittuoeria dell'armá.
Ra musa me bellettega,
Ch'a vorré che cantasse oura de feto,
Ma s'oeggio dí re vostre gren virtù,
Non finirò muoé ciù;
Forse un di fia, che la presaga penna
Osi scriver di te, quel ch'hor n'accenna.