Ms. Ricci 176/A ro Sig. Zan'Antogno Spinelli. Madrid

by Giurian Rosso

←torna a l'endexo

Poesie in lengua Zeneise de Giurian Rosso A ro Sig.r Zan'Antogno Spinelli - Madrid

A ro Paddre Paolin Roccataggiá Predicató Agostiniano→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

A ro Sig.^r Zan'Antogno Spinelli. Madrid

Loudoù quello dro vescovo,
Che con ra vostra lettera
Ciù dose che ri dattari
Dri nuoeve dro preterito,
Scrita d'in Alicantera
M'hei tiroù sciù ro stuoemago,
M'hei misso in corpo l'annima;

E puoescia singulariter
Mi resto obligatissimo
Dra cortesia magnanima
Dro vostr' eccell.^mo,
Patron singolarissimo
De mi fra tutti in Capite,
Chi ten de mi memuoeria,
Così galant'e affabile,
Onde per tante gratie
Giurian se ne va in gruoeria;
Mentr'o ve prega in sdrucciolo
Da vei senza fandonie
Ch'oggié ringratianero
Con quattro serimonie,
Con sento reverentie
Dri concetti dra cantera,
In omnibus fiandome
Dro vostro bon giuditio,
Che così ben ri specola
Serve tutto diggandoghe
Che ghe son s[c]ciavo in sempiterna sęcula.

Veniamus ad rem.
Si comme fin de chì,
Fassando ben ro conto,
Se figuremmo a ponto
Ro scio D. Juan Antonio por Madrid,
Ro qua consideroù
Ben sciù ra feta fin,
O de parei spuoù
Giusto, giusto un menin

Me pá de veive lie
Vuoi, che ve deletté de leccarie,
Stá pescando a re oggié
Con de Damme tappé;
Ma se miegio tappé s'oeran puoei dí,
Dí che se lascian pu tappá da vuôi.
Ben me stimmo ch'in otio non stagghé,
Perchè all'occasion
Sò che sei butta bon,
E nespore no monda vostro fré.
Ma in brutto no pesché,
Che da puoe piggeressi
Serti de quelli pesci,
Che ve faren mondá puoescia a ra fin
CON certe suoe vellugore
Non nespore, ma brugore,
Piceninette comme ri Limuoin;
Ve parlo a bonna fin,
Perchè mi non vorreiva
Che sercando ra Lunna d'in tro pozzo,
Ve fessan vegní sozzo,
Ni saressi ro primmo, ch'a suoe speise
Con re Spagnuoere sé vegnuo Franseise,
Ma ra vinella un poco stá lascemmo,
Dro nostro buoe parlemmo,
Tutta ra patria aspeta,
Comme fa in ciappa ri pescuoei ra meta,
De sentí ra risposta
Con re personne a posta
Comme va ri servixi,

Se con mezo si bon
Dro nostr'eccellentissimo patron
Con quell'amixi vegniremmo amixi,
Ma dubbio non se mette
Mentre ro sò való ben ne promette,
Che s'un Cesare andà, vidde, e vensè,
E lé comme se dè,
Subito ch'o l'arriva, e ch'o l'ha visto
A ra vittuoeria assì restà provisto.

Osciù fassemmo posa,
Ve diggo un atra cosa,
Ch'a s``o tempo da vuoi vorré savei,
Se quarche Zavalì vuoe quella teira,
De ciù vorré, se pu ve contenté,
Se gh'è l'occasion,
Che reverissi un po da parte mé
Ro Sció Rainé Grimado mé patron.