Ms. Ricci 176/A ro P. Stoppa chi disse in Purpito che i Pedanti son Azeni
| ←torna a l'endexo | Poesie in lengua Zeneise de A ro Paddre Stoppa chi disse in Purpito che i Pedanti son Azeni |
A ro Rev. P. Lazaro Gianello bonne feste.→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Si quadrupes Pauperiem, el'è ro testo,
Dixe, pro bestia Dominus tenetur,
Hęc regula quamvis pro vera habetur
In asino ra limita un digesto.
Oura che fuoe de sesto
O l'esce fuoera serti contrapeisi,
Che per dane dro sò nobile assazzo,
Si gh'è ancon circumcirca un pa de meixi,
Mostra sentí ra lunna la de mazzo;
E per questi arbaneixi
Quis tenetur pro hac obligatione?
Chi stà per sti quadrupedi indiscreti?
Che trando casci n'oeran muoé stá queti?
E sercan sempre scapolá in sermone?
Però pro conclusione,
Se questi compagnoin de Balaam
Truoevan dí cose sentan dí sciù in Giexa,
Ro Paddre Stoppa l'è nasciuo a Venexa,
Ma o n'oe però restá Venetian.
E lié così cian, cian
Giusto donde ghe smangia, o te ri attasta,
E in doe parolle per mortificari
A lié ghe basta solo nominari
Per rossignuoé da basto, e tanto basta,
Han ben ra mente guasta;
Ló per mostrase scritturisti a reo
Vuoeran mostraghe a lé ro che, e ro comme,
Si no san manco comme havesse nomme
Ro puoere dri figgiuoe de Zebedeo;
Ma chi non è un Taddeo,
Assertá in bonna Logica se pò
Che pedant'oe dí aze; e ve dirò;
Feghe ro conto allò.
Se cos'oe dí pedante orei savei,
Feve doi pezzi e puoescia ghe virei.
Che così troverei
Dante oe dí un chi dà, pié vuoe dí pié,
Pedante idest è un chi dà dri pié.
Se donca a parei mé
Dá dri pié, tirá casci, o l'è tutt'un,
Aze, e pedante fan tanto per un.