Ms. Ricci 176/A ra mesima invio a ese comá.
| ←torna a l'endexo | Poesie in lengua Zeneise de A ra Sig.ra Delia Spinnora invio a ese comá. |
A ra mesima, aviso d'un figgio nasciuo a ro scio Nicolò Raggio.→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa |
Lustrissima patronna,
In fin per sorte bonna
Sempre manda ro cé quarche desgusto,
Ma quest'e però vei,
Che mi son hommo, che dapuoé m'aggiutto.
Houra me scuserei,
Se ve metto davanti a ra bonassa,
Tutto quello chi passa,
Perche per mé conforto, non vá dí,
Besuoegna che me sciore un po con vûoi;
E per favero presto penetrá,
Senza ciu bestentá,
Sté a sentí mirabilia
Ra Signora Cecilia,
Se ben de fuoera a pá unna figgia savia,
Ancuoé l'è chinze meisi che l'e gravia;
Ma de ciù sté a sentí se l'è da rie,
Ra cosa no stà chie,
Che ghe n'e unn'atra ancon ciu stravagante;
Guardé, se l'è galante,
Mi non ho muoé vist'unna comme questa
Ch'a s'ha cacciou in tra testa
De n'orei despacciá ciù ra barrí;
Si vá poco a contá,
Ch'a non vuôe partorí
Se non ghe promettei d'ese Comá.
Ve lascio infin pensá
Così fit'a ra man,
Comme dè stá contento
Con questo pensamento
Ro povero Giurian;
Mentre che veggo, che sta mattaranna,
Larga in tro mezo ciù che n'è unna botte,
Pá ra nave Pansanna,
Si a me responde, che chi ha poira agotte;
E dęta in questa sduta,
A dixe che così l'e resoluta.
Donca se l'è verissimo,
Che ra signora Delia
Nostra patronna in capite,
A chi ra prega, e supprica,
Non sa negá re gratie,
Ma sempre muoé mostrandose
Con tutti cortesissima,
Sempre galante, e affabile,
Per tutt'eternizandose,
Diffonde ro so merito;
Oura ro tempo è congruo
Da puoei con benefitio,
E gusto dro sò prossimo
Mostrase larga, e sprendida.
De mentre ch'a Cecilia
Non se ghe fa sta gratia,
L'è in fin resolutissima
De stasen'in tro numero
Dri beati pancifici,
Con ra so pansa indropita
Così inanti tirasera,
A fin che ro diascora
Non fasse despruoepuoesiti,
Overo per miracoro,
Fin che s[c]ciuoeppe ra brigora
Strenze ra patientia,
Lasciá cantá re passore.
Donca in somma sommaria,
Mentre Cecilia è in aria,
E mi non mondo nespore,
Ve prego per limosina,
Che ve degné respondeghe
Si comme lié desidera
Hour'oura a questa lettera.
Il che sperando et cetera.