Ms. Ricci 176/A ra Signora Delia Spinnora per unna figgia chi gh'e nasciua
←torna a l'endexo | Poesie in lengua Zeneise de A ra Signora Delia Spinnora per unna figgia chi gh'è nasciua ch'era l'unze. |
A ra Signora Maria Brigida Spinnora.→ |
Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissima patronna,
Si pue, ch'in bonn'hora
Ra Vostra Signoria
Dro má de nuoeve lunne l'è guaria.
Doppo haveive tegnui appeisi
A ro manco treze meisi,
A ra fin l'è svania tutta l'inscieura,
Con azonze a ra bocca ra mangieura.
Ben vorreiva sciù ra fin
Tutte quante re raxoin,
Comme corre chì l'usanza,
Che finisce in sto stato questa danza.
E così Cecilia, e mi
Femmo questo conto chì,
Diggando se l'[è] fonzo, o nascerà,
E se l'è ruoesa ancon a sciorirà.
Ma in somma ò fonzo, ò ruoesa,
Besuoegnava per sta cruoesa
Per passá piggiá partio,
L'e steta ruoesa; osciù laudato Dio.
Scio Giruoemmo staggo a vei,
Ch'o fasse comme quello a mé parei,
Ch'accattand'unna spá, puoe senza penna,
O s'atruoeva in tre muoen solo ra guenna.
Stemm'allegri; sei che l'è,
Eh serché comme se dè
De spedive presto, e ben;
Demeghe la fin che ro visco ten.
Remescieve, non sté quieta
Pre arrivá prest'a ra meta,
Mi non posso quietá fin che no sente,
Che dri signori Franchi sei parente.