Ms. Ricci 176/A ra Sig.ra Maddalena Centurionna

by Giurian Rosso

←torna a l'endexo

Poesie in lengua Zeneise de Giurian Rosso A ra Sig.ra Maddalena Centurionna - Nuoeva d'eseghe nasciuo in masccio doppo havei dito d'ese unna figgia.

A ra signora Maria Brigida Spinnora.→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

A ra Sig.^ra Maddalena Centurionna
Nuoeva d'eseghe nasciuo in mas[c]cio doppo havei dito d'ese unna figgia

Lustrissima patronna,
Per mé bonna fortunna
Non se confà ro feto con ro scrito.
Saveivo, che v'ho dito
Che Cecilia l'ha in cuoé de famen'unna?
E mentre me dixeivi vuoi de noe,
Mi respondeiva che n'aspeto doe?
Ma se noi puoescia stemmo sciù ro feto,
Adeviné se cos'ho dito, è steto?
Perchè m'ha fet'in fin ra mé Zabetta.
Ra rimma, comm'a dí d'unna figgietta.
Ma per non inarrame comme primma
A despeto dra rimma,
Senza sercá ciù da ra Musa aggiutto,

Vuoeggio dive che l'è un mas[c]cio dro tutto.
E mi n'ho gusto, che me pá seguro
De puoeive fá a vuoi assì ro mesmo auguro.
E tanto diggo ancon
In orde a ro scio Giulio mé patron,
E li farà a despeto dro Diavo
Ro sció Lazaro ancora metiavo,
Oltre che puoé, per fame fá un po reo
Cose m'ha za mostroù ro Galateo,
Per terminá ro componimento giusto
Mi in somma sento, e don sentine gusto,
Che ro numero a noi ne cresce ancuoe,
Lé dri suoe servitoi, mi dri figgiuoe.