Ms. Ricci 176/A Giambattista so figgio
| ←torna a l'endexo | Poesie in lengua Zeneise de A Giambattista sò figgio |
A ro Sig.r Gioxeppe Tassorelli→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Figgio, ringratia Dio
D'un meistro così bon,
Godi l'occasion,
Che ti he trovoù Domenedé addormio:
A ti stà conservaro,
Perchè per n'andá in ere,
Mentre in somma vá ciù
Dell'ese ra virtù.
Mi stimmo ciù un bon meistro, ch'un bon Poere,
Perchè l'ommo in feto,
Per diser'a ra bonna,
È comme l'orso, chi nasce imperfetto,
E puoe ra lengua ro perfetionna;
Così ro puoere all'ommo da l'esenza,
Ma ro Meistro ghe dà ra sapienza.