Ms. Marston 56/De la lezenda de messê san Jeronimo/Miracoro de monti zugaoi faito per messê san Jeronimo
| ←torna a l'endexo | Manoscrito Marston 56, 1465 De la lezenda de messê san Jeronimo Miracoro de monti zugaoi faito per messê san Jeronimo |
Miracolo de um zovem devoto de messê san Jeronimo→ |
| azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu); lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze; quarche minnima azonta (tra parentexi quaddre) e ascceimento in notta confrontando con l'ediçion toscaña do 1799 (Ramanzini, Veroña) |
Miracoro de monti zugaoi faiti per messê san Jeronimo
O cheite anchora a alchuni zugoi e grandi ihastemoi, e dixe che o fo in Sezaria um zugao lo quâ aveiva perduo tuto lo so, e questo ihastemando lo nome de lo biao Jeronimo de subito o fo ferio de una saita da cell chi lo amassà.
Anchora lo dicto Cirillo dixe che in Tiro e' fon trei zugoi li quë in lo comensamento de lo zögo e' dissem matamenti contra de lo biao Jeronimo che incomensereiva e finireivam quello lor zögo a despeto de san Jeronimo. E li quë abiando de pocho incomenssao lo zögo, la terra li sorbì in tâ mainera che non se ne trovà mai niguna cossa, e questo dixe lo biao Cirillo che l'odì e vi da quelli chi eram lì prezenti a lo dicto miracoro.
Anchora Cirillo dixe che rente lo so paraxo o ge era um richo e nober cavarê lo quâ avea sorementi[sic] um figio, de lo quâ ello ne era monto acegao, in modo che de cossa che questo so figio feisse de mâ, che de niguna cossa o non lo castigava, avanti o ge soferiva ogni cossa, unde per la rea dotrina che questo grassom se era allevao e speciamenti in zugâ e in ihastemâ e in tute cosse inige.
Or o cheite che um jorno, rente l'ora de vespo, questo zovem zugava, e abiando perduo, con ira o disse: "Fassa pu Jeronimo so che o vögia, che avanti che me parte de chì, e' me ne partirò con goagno."
E digando la dicta parolla, de subito o vègne lo sprito maligno in forma de homo, e monto spaventozo, e in prezencia de tuti quelli chi era lì si lo preize e ne lo portà via, unde non se ne sape mai so che se ne avegnise. E in questo Cirillo dixe che o se penssa che o ne lo portasse in lo infferno.
Una atra fiâ o cheite a caxo che stagando Cirillo a la fenestra de la soa caza e per contra ge zugava lo dicto zovem, si che de necessitae fo de vei lo dicto zovem. Per che lo dicto Cirillo conforta li pairi che non seam teneri de li söi figiolli e che li amunissem in garsonitë, asochè elli seam virtuoxi, e che non ge lassem fâ cativetë, ni cativi costumi, ni cosse sose, asochè a li dolenti pairi non ge acaze so che acheite a questo.
Anchora lo dicto Cirillo dixe che lo veneraber Nicherozo arcivescho de Candia, e lo quâ era andao a vexitâ le reliquie de messê san Jeronimo, e che o fo in la citë um preve, lo quâ era goardiam de la dita zexia, e questo preve era da soa natura monto luxuriozo e invriago, e lo quâ preve vègne a mara morte e fo sepelio in la sepotura de li atri previ. Or o cheite che la sequente nöte, in la dicta zexia, che in lo semiterio fo sentio tanto remô de sonâ de canpane, che li citem corssem tuti spaventai a la zexia e non trovando ni vegando alchuna cossa, si se ne tornàn a le lor caze per vei se vissem quarche segnâ de lo dicto homo. E lo arcivescho comandà a lo pövo che devessem stâ in oraciom per trei jorni per vei so che fosse la nöte sequente. E cossì fo faito. E seando lo pövo congreao in la dicta zexia, e' odim li dicti remoi, e stagando in oraciom lo biao Jeronimo aparsse in la dicta zexia pu lucente cha lo soll e in prezencia de tuto lo pövo o ze a lo otâ unde o ge stè una grande pessa. E seando de questo maravagiao tuto lo pövo, lo biao Jeronimo ge parllà e disse che lo remô che aveam odio era per lo corpo de quello preve, lo quâ era indegnamenti misso in quella zexia, e comandà che ello devesse esse trëto de quello lögo sagrao, e se non lo faissem, che quella pestelencia non secereiva. E dicto questo lo biao Jeronimo diparsse, e lantô lo pövo desoterrà lo corpo de quello mizero preve, e lo trem de quello lögo, e quella cossa sesà. Per la quâ cossa de lì avanti e' avem in grande reverencia lo beao messê san Jeronimo, e a lo dicto arcivescho, lo quâ era vegnuo a vexitâ le reliquie de lo gloriozissimo dotore messê san Jeronimo.