Lunaio Regiña 1891/Prefazion
| Lunaio zeneize compilao da-o sciô Regiña & C. pe l'anno 1891 de Prefazion |
I accertamenti da tascia in scï fabbricati→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Gente viva tûtta quanta,
Affermæ l'anno novanta
Chi minaccia de scappame
Sensa manco domandame
Un pittin de bon servî
Pe poeì fäse sepellî.
2.
Vegni, vegni anno modello,
Tûtto riënte e tûtto bello,
Pin d'inzëgno e pin de scienza
Pe chi stimma l'apparenza:
Vegni e cöri arrûbatton
Che te sbatte o pellisson.
3.
Ti spuntavi pin de sciäto
Scimûlando un attentato
Meditôu da ûn çerto Vitta
Contra Umberto e Margheritta;
Ma quell'ommo desgraziôu
Pe sciacchælo l'han passôu.
4.
Pe-i tò scopi andæti in fallo,
Ti metteìvi o Portogallo
In procinto d'ûnn-a guæra
Provocä da l'Inghiltæra
Pe-o possæsso di terren
Conquistæ in scï Affrichen;
5.
Ma pe-a grande scimpatia
Chi circonda Maria Pia
Se trattegne in lontananza
A borrasca chi s'avanza;
Nè all'Inferno ti porriæ
Mai levate questa coæ.
6.
No mai stanco da to smania
Ti viagiävi pe-a Germania
Pe addesciäghe ûn socialismo
Chêutto e sparso tûtto in ismo
Da Guglielmo Imperatô,
Con che scopi ö sa o Segnô!
7.
Se Bismarche, in odio a-i vivi,
Sostituio da von Caprivi,
Ingrosciandose a sò trippa,
E fümmandose a sò pippa,
O contempla a vanitæ
De mondane dignitæ;
8.
Anche i popoli germanici,
Doppo i scintomi vulcanici,
Veddian quanto liberale
L'é l'orgoglio Imperiäle;
E de çerto, o anno can,
O tò nomme maledian.
9.
T'è riûscio, brûtt'anno vile,
L'addesciä guæra civile
Ne-a Repubblica Argentinn-a
Pe mandä tûtto in rovinn-a
Quello traffego e dinâ
Che l'Europa o fa pensâ;
10.
Ma se spera fermamente
Che o sò nêuvo Prescidente,
Rimediando a-i brûtti guai,
Tanto scemmo o no sä mai
Da no fäte maledî
Da-o presente e l'avvegnî.
11.
Anche a Svizzera o tò tristo
Fä gezuitico a l'ha visto,
E, de lê no ciû padronn-a
Quexi quaxi a Bellinzonn-a
A viveiva in anscietæ
Pe-a sò santa libertæ.
12.
In errô se mì no cazzo,
Proprio o primmo là de Mazzo
Co-a tò gran crisi operaia
Ti tentavi cacciä all'äia
Tûtto o mondo; ma t'han tiôu
Sciû d'in tæra incicchettôu.
13.
Chi pêu dî tûtto l'affanno,
Tûtto o ciento, tûtto o danno
Tûtti i rischi seri e gravi
Che all'Italia ti portavi
Se a posäse sorvia lê
No vegniva a man do çê?
14.
Pe-a grand'arte Lojolesca
De cert'ommi a stava fresca.
Se e grend'ombre di sò morti
Con mandä di sbraggi forti
No gh'avessan dimostrôu
O cammin ch'a l'ha sbagliôu.
15.
I banchetti elettorali,
I disnæ ministeriali,
I discorsci a doppio senso,
Tra o bûrlesco e tra o melenso,
Han mostrôu che corruzion
Se sparzeìva pe-a nazion.
16.
L'ûrna stessa a dimostrava
Quante voti all'ûzo crava,
Quante mûggi de traghetti
Han frûtôu quelli banchetti
Insûltanti a-a povertæ
Chi serpezza ne-e çittæ.
17.
Anno infame e maledetto,
Vanni fito zû in to zetto:
Fa do posto all'anno nêuvo
Che ghe cöran tûtti apprêuvo
Pe pregalo a no voeì fä
Manco un quinto do tò mä.
18.
Ecco, o parla, stemmo attenti:
Son zà stuffo d'armamenti,
Stanco e frûsto de politica,
De polemica e de critica
De notizie remenæ
Pe-i giornali accreditæ.
19.
No ciû voti nè utopie,.
Ma de sode economie;
No ciù eserciti stanziali,
Ma i armæ territoriali
Forse forse a lungo andâ
Da-o sciô Crispi s'adottiâ.
20.
Forse forse s'aviâ cûa
D'aggiûttâ l'agricoltûa,
De no mette ciû de tasce
In sciâ roba chi ha da nasce,
E de dâ travaggio e pan
No a-o foestê, ma all'italian.
21.
Forse forse o l'aviâ tale
Bon criterio commerciale
De no dâ ciû d'ûn intoppo
A-o commercio chi va soppo,
Chi minaccia de fallî,
E sparisce a ciû no dî.
22.
Forse forse i Poæ Coscriti
Da Sûpærba sän contriti
De promette mari e monti
Ancon primma de fâ i conti,
Pe no vedde terminæ
I travaggi incomensæ.
23.
Augûrian nêuve caladde,
Nêuve ciasse e nêuve stradde,
E ciû d'ûn tranvai elettrico
Pe arrivâ, da-o punto estetico
De Sant'Ugo, in sciö confin
Donde gh'è ciassa Manin.
24.
Forse arviân de nêuve schêue
Pe educâ ciû teste vêue
Che fan sgrêuxo a-a nostra Zena;
Forse forse torniä in scena
De mëgioâ ûn pö a condizion
De chi sparze l'istrûzion.
25.
Cai lettoî da me poexïa,
Chi o fa punto e o scappa vïa.
E noiatri o benexiëmo
Quello giorno che veddiëmo
Traformâse in realtæ
I sò voti un pö allarghæ.