 |
Questa pagina a no l'è stæta corretta. | |
7.
Se Bismarche, in odio a-i vivi,
Sostituio da von Caprivi,
Ingrosciandose a sò trippa,
E fümmandose a sò pippa,
O contempla a vanitæ
De mondane dignitæ;
8.
Anche i popoli germanici,
Doppo i scintomi vulcanici,
Veddian quanto liberale
L'é l'orgoglio Imperiäle;
E de çerto, o anno can,
O tò nomme maledian.
9.
T'è riûscio, brûtt'anno vile,
L'addesciä guæra civile
Ne-a Repubblica Argentinn-a
Pe mandä tûtto in rovinn-a
Quello traffego e dinâ
Che l'Europa o fa pensâ;
10.
Ma se spera fermamente
Che o sò nêuvo Prescidente,
Rimediando a-i brûtti guai,
Tanto scemmo o no sä mai
Da no fäte maledî
Da-o presente e l'avvegnî.
