Lunaio Regiña 1891/12
| ←L'ommo barometro | Lunaio zeneize compilao da-o sciô Regiña & C. pe l'anno 1891 de I mecenati do giorno |
Perchè fase aspëtä?→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
CANSONETTA
Provvidenza do Segnô
Chi no ciamma o protettô
Do talento sconosciûo?
Chi faiâ da sostegnûo
Ne-o riçeive e l'aççettä
Un favô da chi o sa fä?
2.
Ma pensando a-i protettoî
Che dispensan di favoî
Che ve mettan a-a berlinn-a,
Aviei l'anima piccinn-a
Da sûbî l'ûmiliazion
Do blaghêur, do fanfaron?
3.
Bællo vedde o sciô Maxin
Circoudôu seia e mattin
Da dûxento e mille artisti
Che pensosi, môcchi e tristi,
Pä ch'aspëtan a caitæ
D'ëse i sò raccomandæ!
4.
Tûtti cöran e van là
Pe-e promisse ch'o ghe fà:
E, sûbindose a tortûa
De quest'infima creatûa
Perdan spesso l'occaxion
D'avei quarche commiscion.
5.
Ma de fêua comme in çittæ,
Ma fra l'äta societæ
Pe-e sò gren fanfaronate
Tûtti o stimman mecenate
De l'inzegno trascûrôu,
Do talento abbandonôu.
6.
Bællo vedde o sciö Bastian
Tûtto pin de liste in man,
Pin de schede e de biggetti
Pe poei tiäve zû i franchetti
A vantaggio d'ûn autô
Da portalo a-o ciæo do sô!
7.
Poei vortä de caroggin
Pe schivä questo streppin,
Ma l'eì sempre li davanti
A pregave comme i santi
Perchè a firma ghe mettei
A favô de chi nö sei.
8.
Se pe caxo vixitæ
E sò sale ghe trovæ
Un mûzeo de scienza e d'arte
Che ghe ciêuve da ogni parte;
E che quande o l'exitiä
A sò mancia o se tegniä.
9.
Mi però fra questi duî
Che se spaccian protettoî
Lodo e stimmo ciû o segondo
Perchè, visto ben in fondo,
Quelli artisti che gh'andian.
O sò tempo no perdian.