Lunaio Regiña 1889/Revista da çittæ
| ←Prefazion | Lunaio zeneize compilao da-o sciô Regiña & C. pe l'anno 1889 Revista da çittæ |
Programma de Feste pe-o Quarto Çentanâ da scoværta de l'America→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Dialogo tra o Sciô Reginn-a e a Cattainetta
Sciô Reginn-a! Sciô Reginn-a!
Donde diàscoa sciâ camminn-a
Coscì solo pe-a çittæ?
Ghe ne vendo portûghæ?
Sciâ se sciacche due nissêue!
Pe vosciâ no ghe l'ho vêue........
Ben che son co-o fî da schenn-a
Asbasciôu da-a novantenn-a,
D'inconträve, o Cattainin,
Me ven torna l'axillin;
E co-o chêu tûtto in raväxo
Me ven coæ de däve ùn bäxo.
Miæ che boâ! Miæ che pestûmmo!
Che ninnin chi và in consûmmo!
Ghe rinasce o prìmmo peì....
Cattainetta, v'offendei?
Sei che bûrlo, e no mincionn-o...
Questa chi, no ghe-a perdonn-o!...
Cattainetta, femmo päxe!
V'arvo a scattoa, se ve piäxe,
Un preìzin de quello bon
Pe fortûnn-a ghe l'ho ancon.
Pe no paì che tëgne dûo,
Un preizin no ghe-o refûo.
E l'é vëo quanto se sente
Mogognâ da tûtte e gente,
Ch'andiâ zù mëza çittæ
Pe-e gren stradde progettæ?
Sci, l'é vëo, ma o tempo o passa,
E se va comme a lûmmassa.
Ma frattanto i pixonanti,
Pe trattäne ûn pö co-i guanti,
Co-i progetti in sospenscion
Montan sempre ciù a pixon.
E (ghe-o digghe in confidenza?)
Mi no-a veddo quest'ûrgenza
De cacciâ zù mëzo Zena
Pe fâ nasce a cantilena,
Pe addesciâ torna e lamente
De miggiæa de pövie gente
Che assostäse no savian
Se in Bezagno ó se in Caignan.
Vêuan mandane a stä pe-i bricchi
Pe fâ o comodo di ricchi?
Tûtti birbi d'ûnn-a pasta!....
Cattainetta, basta! basta!
Co-o çervello in pö alterôu
M'andæ fêua do semenôu.
S'ei da flemma e da paziensa
Ve fö vedde quest'ûrgensa.
A montâ de Piccaprïa
Da gran tempo a cianze, a crïa
Che gh'acciantan o piccon
Pe leväghe l'infezion;
Che l'Uspiâ comme l'Uspiæto
Guadagnian da questo fæto.
Manco dïve, mi no vêuggio
Che d'ostacolo e de schêuggio
A no pêu mai che servî
A-i travaggi da compî,
A-i progetti in relazion
All'impianto da Stazion.
Sciô Reginn-a, son convinta
E me daggo zà pe vinta;
Ma, ripëto, dond'andian
Tante gente? a stä in Caignan?
Quand'avian cacciôu zù tûtto
Gh'arrestiâ dezerto e mûtto!
Cattainetta, stæ persûasa
Che gh'alzian ciù d'ûnn-a casa
Rispondente a-a proprietæ,
All'igiene da çittæ,
Ciù co-i tempi in armonïa
Che l'attuale Piccaprïa.
Stradda Giûlia, meschinetta,
Comme ûn in cappelletta
Tra l'affanno e l'anscietæ
Da gran tempo a crïa pietæ,
E fan eco ai só lamenti
Quelli pövei esercenti!
Azzûnzeighe i centi e i guäi
Di só tanti proprietäi
Che con queste sospenscioîn
Sensa schêuve de pixioîn
Da-e gren tasce son costreiti
A mangiäse scinn-a i teiti!
Dall'attuale Municipio -
S'é do maeximo prinçipio,
S'é da stessa convinzion,
E s'aspëta con raxon
Un aggiûtto da-o Governo
Pe levâ sto cento eterno!
Sciô Reginn-a, bene! bravo!
Questa chi no l'aspëtavo,
Con do späximo de chêu
Vive allegri no se pêu:
E piggiäne a chi no schêuve
Son barbarie tûtte nêuve!.....
De maligno no se pecca
Se se dïxe che Ravecca
E i ciûvozi carroggin
Che co-a Chêulloa fan confin
Da gran tempo rendan Zena
Un mäd'êuggi, ûnn-a cancrena.
Câo vosc[i]à, se chi ghe ciêuve
Cöse importa? E stradde Nêuve
Son tegnûe da-i nostri poæ
Pe-a gran pærla da çittæ,
Pe-a gran parte aristocratica!...
Cattainetta, sei fanatica?
Mentre femmo ûn pö de critica,
No n'intremmo ne-a politica
Che ne-o mâ comme ne-o ben
Pe noiätri a no conven.
E lasciando corrî o vento
Ritornemmo in argomento:
Stradda Corsega a m'imponn-e
Che de lê, mi ne raxonn[-]e
Con rispætto, con favô,
Con gran löde, con önô
Pe-a grandessa e l'imponenza
E pe-a só magnificenza.
De san Giacomo a valladda
A l'aviä ciù d'ûnn-a stradda
D'ærboatûa ben ombrezzâ,
Ciann-a, larga, lastregâ,
Con di bælli caseggiäti
Fabbrichæ da-i meno-agiäti.
Ma frattanto e fronti basse
Se ne van comme e lûmmasse
Con brüxô di çittadin!.....
Consolæve, Cattainin,
Che faiô tanto fracasso
Che fra poco andian abbasso.
No passiâ sta Primmaveia
Che Fossëlo e che Sozeia
Sän co-o nûmero di ciù,
Pe no dïve cacciæ zù:
E veddiëmo a stradda Döia
Continuâ scinn-a in Portöia,
Sensa criä sempre a-o dezærto
Quella stradda Carlo Albærto
A-a veddiëmo ûn pö adattâ
A-o bezêugno da giornâ,
Prepotente, natûrale
Do sviluppo commerciale.
Con mezûe ciù serie e pronte
Terminiän a stradda a Monte
Che da-a ciassa de Manin
Con sant'Ugo a l'ha confin:
E gh'alziän e nêuve Schêue.
Ghe l'ho pinn-e e mæ nissêue!...
Cattainetta, stæ segûa
Comme a Tûrsci s'ha premmûa
Che riguardo all'istrûzion
Segge Zena in condizion
De poeì fâ da concorrenza
A-e çittæ de conseguenza.
Se presentan i programmi
Çerti ganci, çerti lammi,
Çerte spinn-e appöze a-o chêu,
E di meistri e di figgiêu;
N'ha gran colpa o Parlamento
Pe-o sò strano cangiamento.
Oh, che metodo mai brûtto!
Vêuan mostrâghe ûn pö de tûtto
Pe foräne di cretin!
Bocca a bûscio, Cattainin.....
No veddei che se fâ scûo?
Stæme allegra, ve salûo!