Lunaio Regiña 1889/Programma de Feste pe-o Quarto Çentanâ da scoværta de l'America
| ←Revista da çittæ | Lunaio zeneize compilao da-o sciô Regiña & C. pe l'anno 1889 Programma de Feste pe-o Quarto Çentanâ da scoværta de l'America |
O Ciarlatan→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
de Feste pe-o Quarto Çentanâ
Müza, pe-a quæ ciammavan o Cavalli,
O Petrarca Zeneize, damme man,
Perchè ripëte comme i pappagalli
Quello dialetto antigo Portolian:
Scûzando ch'armonizze o mæ cantâ
Sensa l'incontro de ro sciô e ra sciâ.
2.
Scûza se, pe toccâ çerte campann-e,
Antiçipôu mi daggo a-i mæ lettoî
O Programma de feste Colombiann-e
Che faiâ Zena ne-o Novanteduî
Con immenso concorso de foestê
E tanto sciäto de derrûäne o çê.
3.
Tûtti san che Colombo o l'ëa zeneize,
Tûtti san che l'America o scrovïva,
Tûtti san che pe ûn re fâso e scorteize,
In ta mizeia e tra e cadenn-e o moïva
Ma da tûtti s'ignora e pochi san
Ch'o l'ëa de mente e d'anima italian.
4.
Onde Zena e l'Italia, ricorrindo
O Quarto Çentanâ da gran scoverta,
Pinn-e de quell'amô sincero e lindo,
De stimma e d'önô reizi all'äia averta,
Ciù progetti fan zà pe festezzälo
E'n moddo decorözo pe onorälo.
5.
Centro de feste o sä caroggio Drïto,
Perchè chì de Colombo parla tûtto,
Perchè chì ciù d'un dæto e ciù d'un scrïto,
Ben che da-i tristi tempi reizo mûtto,
In quelli marmi antighi e in sciö pappê
Bælla testimonianza o fâ de lê.
6.
In fondo da montæta de Morçento,
Proprio rimpætto a-o carroggin di Scciavi,
Existe quell'antigo monumento
O quella casa donde i sò bezävi
Ghe favan tûtti o scarlassôu da lann-a,
Con gloria da famiggia Colombiann-a.
7.
Chi cresceiva Cristoforo Colombo,
De chi o partïva desdegnozo in cëa,
Perchè a scoverta da poeì fâ rimbombo
A no n'appartegnïva ä só bandëa;
Perchè l'ëa scrito che l'ingrata Spagna
A se gödisse lê quella cöcagna.
8.
Dappertûtto s'arviä de nêuve stradde
Da poeighe co-e carrosse circolâ,
Se finiä d'ingrandî tûtte e caladde
Pe fâ che se ghe posse rermesciâ
Tûtto quello gran maöxo de personn-e
Che quante seggian no se pêu supponn-e.
9.
In Bezagno, cacciôu zù e fronti basse,,
Ghe sä l'Esposizion de Bælle Arti
Onde i artisti d'äto bordo e bassi
Ghe porriän concorrî da tûtte e parti,
Qualunque segge a schêua, o graddo e o sesso,
Con önô de l'Italia e do Progresso.
10.
S'innaugûriä di nêuvi monumenti
A-i grendi e benemeriti italien
Che co-a spâ, co-e ricchesse e co-i talenti
Se son tanto occûpæ do nostro ben;
A Garibaldi e a-i só garibaldin,
A-o dûcca de Galliera e a Rûbattin.
11.
Se dïxe (e che l'é vëo mi me n'accorzo
Da quanto i nostri poæ da patria fan)
Che do vëgio palassio de san Zorzo
Ne formiän o Mûzeo Colombian
Donde tra e raritæ d'Archeologia
O Congresso ghe sä de Geografia.
12.
Ne-o nostro porto se faiâ regatte
Borgheixi e militari e tïi a segno,
E reviste e manêuvre de fregatte
Da squaddra corassâ comme de legno;
Con tûtte e flotte de nazioîn foestëe
Rappresentæ da-e brave sò bandëe.
13.
Dïxan che se finziâ probabilmente
Da-a Societæ Colombo a Spedizion
Ammiando de tegnïse fedelmente
A-i costûmmi do tempo e ä tradizion.
E veddiëmo e carcasse dæte fondo
Che partenza faiän pe-o Nêuvo Mondo.
14.
Veddiémo o nostro porto illûmminôu
E i forti e i monti che ghe fan coronn-a,
Formâ ciù d'ûn giardin tûtt'incantôu
Da-i tanti ciæi, che no ghe sä personn-a
Chi no digghe confûza e mäveggiâ
A Zena solo questo se pêu fâ!
15.
Spero che Verdi da o palassio Döia
Ammiando o mâ da nostra bælla Zena,
Pe önorâ de Colombo a gran memoia
O vêuggie, a Dio piaxendo, mette in scena
Un'Opera de pôso e de cartello,
Degna do Rigoletto e de l'Otello.
16.
Questo l'é o vöto de l'Italia intrega,
Nonchè da nostra Ligure reginn-a:
E mi faiö comme chi cianze e prega
Con dïghe: Da to mûxica divinn-a
Danne, o gran Verdi, a noî questa primizia,
Che Colombo da-o çê n'aviâ letizia.
17.
In questi tempi che tûtte e nazioîn
Sbraggiando päxe, s'arman scinn-a a-i denti,
E stimman ciù o fracasso di cannoîn
Che l'armonïa de vöxi e di strûmenti;
Ti solo, sensa däte do sûssiëgo,
Co-o genio ti mäveggi o mondo intrëgo.
18.
Se co-a perseveranza ti-æ scoverto
Nêuvi mondi nell'arte mûxicale,
Ho pinn-a confidenza, mi son çerto
Che ne-o giorno da festa Nazionale
Ti, che vigô con i anni ti no perdi,
T'incarni o nomme de Colombo e Verdi.
19.
Mûza, chi me rivolzo a-i nostri poæ,
Perchè spiëgan ciù zelo e ciù energïa
Ne-o mette man a-e stradde progettæ,
Ne-o fâ che cacciôu zù no segge prïa
Primma che no se pense seriamente
De case a fabbricâ pe tante gente.