Lunaio Regiña 1889/O Cagnetto da Scignöa
| ←A Biricchinn-a | Lunaio zeneize compilao da-o sciô Regiña & C. pe l'anno 1889 O Cagnetto da Scignöa |
A-o galloppo→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
O Cagnetto da Scignòa
Sûnetto
Ammiæve ûn pittin là quello cagnetto
Barbin bastardo chi no pêu scricchî!
Ammiælo comm'o s'arve da-o toscî!
Comm'o s'astissa! comm'o piggia o petto!
O l'inciastra i tappëti, o brûtta in letto,
O no fa che despëti e che rompî
Gòtti, cicche, tondin, brocche, baçî,
E ciù d'ûn bællo spëgio e d'ûn quaddretto.
Eppù ghe dan beschêutti e confittûe,
E pëti de pollastro e minestrinn-e,
E sûppa e polentin d'êuve sbattûe.
E gh'accattan de pûrghe e de mëxinn-e,
E ghe fan i fûmmenti, perch'o sûe:
Me ne rallegro! brave scignorinn-e!