Lunaio Regiña 1889/A-o galloppo
| ←O Cagnetto da Scignöa | Lunaio zeneize compilao da-o sciô Regiña & C. pe l'anno 1889 A-o galloppo |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Sûnetto
Se vive, se camminn-a, s'amma fïto
S'affann-a d'imparâ tûtto spedïo,
E se mangia, e se dorme d'in pê drïto,
Se parla sensa mai piggiâ respïo.
Spedî e riçeive da qualunque scïto
A l'é röba d'ûn ætte, d'ûn sospïo;
E zà quello romanzo e quello scrïto
L'annunzian primma che l'aggiæ finïo.
In t'ûn ætte se fabbrica palassi,
S'allivella e s'ascciann-a ogni terren
Con tûtta l'esattessa di compassi.
E doppo tanto giäla e giäla ben,
In t'ûn bägio de gallo, in pochi passi
Finimmo pe affermäse in te Staggen.