Lunaio Regiña 1888/O primmo cavello gianco
| ←L'occupazion de nostre scignorinn-e | Lunaio zeneize compilao da-o sciô Regiña & C. pe l'anno 1888 de O primmo cavello gianco |
O baxo→ |
Sûnetto
Quand'a vedde spuntâ tra ciocca e ciocca
A primma fia d'ûn cavello gianco
A zovena ciù bælla e ciù bacciocca
Trattegnîse da-o cianze a no pêu manco.
Invece de vestise a s'ammallocca,
A no n'ha ciù quello fâ læsto e franco,
A no fà da malemma, a no se stocca,
A coæ ghe scappa de locciâse o fianco.
A ven pinn-a de gravi pensamenti
E da mille fastiddi e despiâxei;
E pä ch'a digghe: Addio, divertimenti!
Da creddise no pâ che quello pei
O g'agge fæto cazze i sentimenti,
Quande e veddei spuntâ, donne, cianzeì!
V.