Lunaio Regiña 1888/L'occupazion de nostre scignorinn-e

Lunaio zeneize compilao da-o sciô Regiña & C. pe l'anno 1888 de V.
L'occupazion de nostre scignorinn-e

L'occupazion de nostre scignorinn-e

Cansonetta

Pe-e mûägie do giardin
E grigôe^[sic] stan a-o sô
E cessa l'öxellin
A sò canson d'amô.
Zà l'ôa do Mëzogiorno
Sêunnan tûtte e campann-e
De gëxe ciù lontann-e
E quelle ciù vixin.

2.
In ta stansiëta ornâ
De räzo adamascôu,
E tûtta mobigliâ
De legno raffinôu;
Sêunni de Paradizo
Dorme sotto a tendinn-a
A bælla scignorinn-a
Ne-o letto profûmmôu.

3.
Dai palpiti do chêu
E da-o bocchin d'amê
Conosce se ghe pêu
Comme se rïe in çê,
E ne-o provâ l'incanto
D'ûn Paradizo vëo
A n'ha nisciûn penscëo
Do mondo nè de lê.

[p. 43 modifica]

4.
A nobile miscion
Da donna in societæ,
O stûddio, l'istrûzion
Son tûtte röbe ûzæ;
Son i sò pensamenti
O spëgio, a töa, o letto,
Un verso, ûn romanzetto
De quelli stramballæ.

5.
In casa gh'é a mammà
Chi çerca de crovî,
Gh'é a borsa do papà
Chi ven sottî sottî.
Gh'arriva ûn bon partïo;
Ma s'a no perde o vizio,
Ma s'a no fa giûdizio
Comm'a l'andiä a finî?

6.
Con ëse in zoventù
E sann-a comme ûn meì,
Ghe vêu ciù servitù
Che pe-a moggê d'ûn Beì
E se 'n te quella casa
N'andiâ tûtto in malôa
Pe colpa da scignôa,
Fra poco ghe veddieì.....

7.
Secolo illûminôu
Fra tante tò invenzioin
A-a lûxe ti hæ portôu
A razza di potroin
E l'ozio incoraggiando
De nostre scignorinn-e
In lagrime, in rovinn-e
Ciù case ti hæ mandôu.

V.