Lunaio Regiña 1888/O Terramotto a Zena
| ←O sciö Tognin bûrlon | Lunaio zeneize compilao da-o sciô Regiña & C. pe l'anno 1888 de O Terramotto a Zena |
O bivacco all'Accassêua→ |
Doppo e raggie, doppo i sfêughi
D'ûn inverno orrido e crûo,
Un mattin tra o ciæo e o scûo
4Quand'ammortan i lampioin,
Se sentîva ûn lûo profondo
Chi vegnîva zù dabbasso
Tûtto scimile a ûn fracasso
8De carriaggi e de vagoin.
Se sentîva in crïo d'öxelli,
Un scrollâ de gaggettinn-e,
Un sollevo de gallinn-e,
12Un baiä de tûtti i chen.
Poi ballavan tûtti i letti,
Tûtti i quaddri, tûtti i spëgi;
I mûagioin moderni e vëgi
16Ninnezzavan co-o terren.
Fæto sta che tûtte e gente
Ben che tiasse da gran bîxa
Mëze nûe, quæxi 'n camîxa
20Camminavan spaximæ,
Se sentîva dappertûtto
Domandäse con affanno
Che desgrazia, che malanno
24L'ëa successo pe a çittæ.
Se veddeiva de biondinn-e
Con quell'äia ancon da nêutte
Scilenziose, chêutte, chêutte,
28Co-a frangetta spampaggiâ.
Se veddeiva di zuenotti
Che l'armoäsa ghe façeivan
Con l'êuggin, mentre finzeivan
32De vegnîle a consolâ.
Ciù tremmante d'ûnn-a fêuggia
Se veddeiva o coraggiozo;
Se veddeiva o dormiggiozo
36Chi s'ëa fæto mattinê.
Con ûn fä tûtto contrîto
Se veddeiva a beghinetta
Giasciä l'Ave co-a cönetta
40Pe placâ l'ira do çê.
Camminavan tanti e tanti
Con a faccia tûtta smorta
Pe aggueitä chi gh'ëa da-a porta
44A sûnaghe o sûnaggin.
Gh'ëa de quelli che ingrandindo
L'imprescion do terramotto
Camminavan co-o fangotto
48Tûtto sciù pe-i terrapin.
Tanti e tanti co-a valîxe
Pe poei fîto scappâ via
Son andæti in ferrovia
52Bælli, pûri, ancon zazzûn.
In camixa e co-o cilindro
Camminava ûn çerto tale
Bællo tipo originale
56Tra e risate de ciù d'ûn.
Carlevâ l'ûrtimo bägio
O mandava proprio allôa
E ne-o bællo da demôa,
60In to cädo do ballâ.
A-o Veglion Carlo Feliçe
A soffîta co-a lûmea,
Tûtti i palchi co-a platea
64Se son missi a ninnezzâ.
Quelli povei mûxicanti,
Con a gôa grossa grossa
Da-o sûnâ, sentindo a scossa,
68Diventavan de pappê.
Mëze imbriæghe e sbalordie,
Tûtte pinn-e de spavento,
E personn-e ch'ëan là drento
72A strisciase i ranversê;
Se son misse e gambe in spalla
Pe sarvase e sò quattr'osse
Tra o succedise de scosse
76Ch'ammortavan i fanæ.
Tante bælle mascherinn-e
Tra i gren sbattiti de denti
Se n'andävan pe-i sò venti
80Mucche, mucche, abbacciocchæ.
Là da-e parti do Bezagno
(Borgo, Pilla, san Frûttuozo)
Gh'ëa do bûffo e do pietozo
84E da gran sollevazion.
Se veddeiva ommi e donne
Co-i figgiêu ch'abbandonavan
E sò case, e s'accampavan
88In sciö Prôu con confûxion.
Poi davanti a-a cappelletta
Là de Anime da Foxe
In zenogge e con gran voxe
92Se metteivan a pregâ.
Ma lasciemmoli che pregan,
E tornemmo drento Zena
Pe poei vedde ûn'ätra scena
96Ciù cuioza e da contâ.