Lunaio Regiña 1887/Prefaçion
PREFAZION
Ho passôu zà l’Ottantûn
Sensa fä torti a nisciûn,
Sensa fä da maldicente.
Da satirico indecente:
Divertindo i me Zeneixi
Con i moddi ciû corteixi,
Con allegre cansonette,
Campagnate, barselette,
Che corrivan ben dappresso
A-o gran cäro do Progresso.
2.
Son zà gianco e mëzo peôu,
Ma de chêu no n'ho cangiôu
Nè de cô, nè de bandea:
E delungo allegro in ciea,
Pin de bûrle, pin d'axillo,
San e vispo comme ûn grillo,
Pöveo scì, ma indipendente
Da qualunque prepotente,
Doppo fä versci a carasse
Me ne staggo in te mæ strasse.
3.
Ëa piccin, ma i fræ Paghen,
Comme mì bizäri e sen,
Premurozi do mæ stato
M'ingrandivan de formato;
M'accresceivan d'indirissi,
D'inserzioin a prexi fissi,
Conzunzendo co-a bellessa
L’ampiamento e l'esattessa
D'ûnn-a Guidda Commerciale,
Çittadinn-a e Provinciale.
4.
Doppo questa introduzion
Chi precede a Prefazion,
Piggio fîto o canocciale
E l'Europa in generale
Veddo in fêugo, in gran fermento,
In minaccia d'intervento
Pe spartîse a Mezalûnn-a
Che mä vista dä fortûnn-a
E piggiâ da l'etixïa
A se trêuva in angonïa.
5.
Là da-a parte di Balchen
Tra o fûmmâ de ciû vulchen
Veddo a nobile Bulgaria
Stanca, frûsta de barbaria
E sdegnoza d’inchinâse,
D'avvilïse e d'ûmiliâse
A-o Cosacco prepotente
Chi l'opprimme atrocemente
In te tûtti i sò ideali
Santi, giûsti e nazionali!
6.
Oh trattato de Berlin
Dimme ûn pö a tò degna fin!...
Ne fasciavan do salamme?
Di friscêu? T'han dæto a-e sciamme?
T'han firmôu coscì pe rïe?
T'han cacciôu fra e utopïe?
Perchè ûn Prinçipe virtûoso,
Franco, sccetto e coraggioso,
Chi viveìva in ta sò scorza,
L’han costreìto a cede ä forza?
7.
Veddo l'Austria protestâ
Con l'aggiûtto do dinâ
Che ghe porze l'Inghiltæra
Pe intizzala a mêuve a guæra
All’Autocrate da Rûscia
E tegnîlo in ta sò sgûscia
Onde lê o no faççe pratiche
Pe ottegnî conquiste asiatiche.
Ma son cöse da pensale
Se Bismarche o sta neutrale!....
8.
Veddo a Fransa fä o bocchin
All’assäto de Berlin:
E finzendo ûnn-a pizaggia
A s'appægia pe-a battaggia
Chi pêu alsä de nêuvo a bansa
Da sò gran preponderansa;
Ma Bismarche o no n’é sciollo
Pe piggiâse quarche scrollo
Chi ghe mande in preçipizio
O grandiozo sò edifizio.....
9.
E l'Italia? Pövea lê!
S’a tegniä tra mille pê
Quella nobile sò scarpa
Chi se lecca e chi se parpa
Da-i ciû fûrbi e prepotenti
In ti critici momenti
Sensa fäla manco batte
Pe cacciala in te savatte
Se no san ciû cöse fâne.
E Massaua a pêu inforâne!....
10.
O ministri e depûtæ
Pe l’Italia cose fæ?
Tra dûxento e mille ganci
Fæ dormî tûtti i bilanci.
Pe Depreti e i sò traghetti
Fæ a figûa da marionetti;
Ve ne stæ, con nostro danno,
In campagna tûtto l'anno;
E finïo dôe farsetinn-e
Ne lasciæ tornâ in te spinn-e.
11.
Ma con tanto de stafî,
Pe levâve da dormî
E da-o fä cose scorrætte,
Eìve chi l'Ottantesætte.
Sciscignori, o no mincionn-a,
Manco a Cristo o no a perdonn-a;
Ma o l'è giûsto, ma o l'è serio,
De bon chêu, de bon criterio;
E o ve guidda in bonn-a stradda
Sensa fä tanta caladda.
12.
Da quattr'êuggi o ve diä
Che d'invece de parlä
De puntigli personâli,
De giöxie municipâli,
D'interesci de partïo
E d'affari de regïo,
Tûtto o tempo che v'avanza
L'impieghæ pe-a sciâ Finanza
Ch’a l'é lì tramëzo a-i schêuggi
E da-o cianze a n'ha ciû d'êuggi;
13.
Che miggiæa d’agricoltoî
Ne-a pellagira son a moî;
Che se fan tûtti emigranti
Pe sarvase da-i birbanti,
Pe no fä ciû vitte gramme
E languî da freìdo e famme;
Che conven cangiä de stile
Co-a Marinn-a Mercantîle
Chi minaccia fallimento
Se s’addorme o Pariamento.
14.
O vegniä cianin, cianin
Pe poeì dîve in te l’oëgin
Che de codici penâli
E civili e commerciâli
Veo bezêugno se ne sente
In te l'epoca presente:
Che ghe vêu o castigamatti
Pe-a sciâ Stampa da ricatti
Chi avvelena e chi scompiggia
O santuaio da famiggia.
15.
O sbraggiä che no se pêu
Edûcä ben i figgiêu
Specialmente in çærte schêue
Che da-o tanfo se ghe mêue
E verghêugna no s'ha manco
De tegnîne sei pe banco:
Che conven sbandî i programmi
Da fasciâghe di salammi
E bandî i economïe
C’han l'effetto de fä rïe.
16.
O shraggiä che i bûtteghæ
Devan ëse vigilæ
Quande fan çærta mesciûa[sic]
Pe mandâne ä seportûa:
Che per lö l'epidemïa
A ne piggia ûn pö d'ammïa
E no særve a quarantenn-a
A tegnîla co-a cadenn-a,
Ma ghe vêu l'arma legale
Do baston municipale.
17.
Stæ segûi, che se faieì
Scrupolösi o veo doveì,
Quest’annetto ûn pö severo
Ma de chêu, comme mì spero,
O ve fä de gren cioccâte,
De sfarzose fiaccolâte,
De miggiæa de complimenti,
Di grandiozi monumenti:
Comm’o l’ha o piaxeì speciale
D'augûrâve ûn bon Natale.