Lunaio Regiña 1885/Se foïse...
| ←In Löde di Cappoin | Lunaio zeneize compilao da-o sciô Regiña & C. pe l'anno 1885 de Se foïse... |
L'Ægua da Scrïvia e l'Ægua do Gorzente→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
SE FOÏSE....
Se foïse o sô chi spunta dall’oriente
Invece de spëgiame ne-a rozzâ,
Spuntando ciû axillozo e ciû lûxente,
Ne-a vostra faccia me vegniæ a spëgiâ.
Se foïse lasciù in çê con i ätre stelle
Vorrieiva contemplâne i vostri êuggin
Che pä che scappan fêua d’in te parpelle
Pe provocâ ciù sguardi e ciù baxin.
Se foïse quella spiägia o quello schêuggio
Donde de Lûggio ve vegnî a bagnâ,
Pe dimostrâve o ben che mì ve vêuggio
Da ciù d’ûn mouxo me faiæ baxâ.
Se foïse ûn gòssettin, ûnn-a barchetta
De quelle ciù pûlite e ben sparmæ
Vorrieìva fâve fä ninn-a ninnetta
Quande s’increspan tûtte e ægue sæ.
Se foîse ûn prôu de scioî tûtto coverto,
Quando seì stanca, ve vorriæ servî
Pe letto da dormivene a-o scoverto
Tra l’äiettinn-a imbarsamâ d’arvî.
Se foïse un riän con l’ægua cô d’argento,
Quande l’è coscì cädo, mi vorriæ
Che ghe mettesci a vostra bocca drento,
Cô do cinabro pe levâve a sæ.
Se foïse ûn bosco tûtto pin d’ombrezzo,
Quande pe fresco ghe vegnî de stæ,
Mi ve vorrieìva fä ciû d’ûn strionezzo
Perchè, mæ cäo pollin, no ve n’andæ.
Se foïse ûn bællo còsto de viovetta
De goççe de rozâ lûxente e pin
Vorriæ che m’arrancasci tra l'erbetta
Pe fâvene ûn grazioso massettin.
Se foïse ûnn-a rozzetta appommellâ,
Chi manda intorno i ciù soävi odoî,
Tra i ätre rêuze mi vorriæ spûntâ
Perchè pe-a primma m’arrancasci voî.
Se foïse o ventixêu de primmaveia
Con vöxe ciù soäve che l’amê
Mi ve daiæ o bon giorno e a bonnaseia
Quando pe-a stradda ve vortæ inderrê.
Se foïse ûn bællo anello co-i diamanti
Che se veddan lûxî comme lûmmin,
Vorrieiva ûn pö brillâ d’aoa in avanti
Ne-o vostro bællo dïo marmellin.
Se foïse o roscignêu da vostra gaggia
Vorriæ cantâ da-o nasce a-o moî do sô,
E sensa sfêugo de pascion nè raggia,
Cantiæ pe meritâme o vostro amô.
Se foïse ûn bôn pittô pe fâ ritræti
Quand’avanzâ ve veddo da-o barcon
Ve dipinziæ tûtte e fattesse e i træti
Tanto gentili e da dipinze son.
Se foïse o ciù stimmôu compoxitô
De mûxica, ne-o mentre che cantæ
Co-a vöxe d’ûn angiëto do Segnô,
A-o vostro bællo canto m’inspiriæ.
Se foïse ûn guerrezzê di ciù valenti,
Quande da patria se trattiæ pe-o ben,
Tra mille privazioîn e patimenti
A voî mandieìva i mæ sospïi lonten.
Se foïse re, mì ve faiæ reginn-a
Pe fâve da-i mæ sudditi adorâ,
Perchè d’ammiâve voî, bælla bambinn-a
No me vêgnieívan a detronizzâ.