Lunaio Regiña 1885/O Depûtôu Affarista

←Revista do Colera

Lunaio zeneize compilao da-o sciô Regiña & C. pe l'anno 1885 O Depûtôu Affarista

I Marionetti→

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

O DEPÛTÔU AFFARISTA

---

Ritræto

---

Dä lunxi e a primma vista
Tra mille depûtæ
Conosce l’affarista
Poeì solo che l'ammiæ.

O schitta comme a gomma
Quande gh’è l'avertûa
Do Parlamento a Romma,
Pe fä primma figûa.

O marcia co-a carrossa
Pe fä vedde che lê
O l’è personn-a grossa
E vëgia do mestê

Veddendo amixi e clienti
Che spuntan dä lontan
O ghe fà i complimenti
C’ûn largo rêuo de man.

Nell’öa che ’n Parlamento
Ghe regna o bollezûmme,
Lê, pe cangiä de vento,
O scenta comme o fûmme.

Do tûtti i ministeri
O monta e-o chinn-a a scâ
E con bidelli e ûscieri
Savendose frettâ;

O riesce aveì l'ûdienza
Do cappo Divixion,
E poi de sò Eccellenza
Chi guidda o carrosson

Pe sostegnî a baracca
Di mûggi de stroscin
De lettere in ta stacca
O l’è de lungo pin.

Benchè l’avvocatûa
O no n’ha mai stûdiòu,
Pe intrïgo e pe impostûa
Da tûtti o l’è çercôu.

Perchè sensa fà sciäto
O vîve d’imbroggiâ
O Municipio e o Stato
Con fâli litigâ.

O naso dappertûtto
Doppo d'aveì zà infiôu,
A-a camera stà mûtto
O nostro Depûtôu;

Ma miæ comm’o se scialla
Che veddan tûtti quanti
Scûggiâ quella sò balla
Nell’ûrna di votanti!...

Con dâ voto contraio
O cöre a strenze a man
Ridente all’avversaio
Chi cazze all’indoman.

E sens’aveì nè Dio,
Nè patria e religion,
" Sostegno o mæ partïo "
O te ghe dixe ancon!...

Quande minaccia o Stato
Crisi ministeriale,
O vâ da-o candidato
In vöxe generale;

O se ghe chinn-a in tæra
Con i atri depûtæ
E poi o ghe fa guæra
S’o l’ha da serietæ.

Queste son e sanguette
Che sûssan e nazioîn!...
Queste son e servette
De mille e ciû padroîn!...

Lô cangian de governo
Comme a cangiä vestî,
E caccian a quaterno,
Quello che vêuan servî.

-)o(-