Lunaio Regiña 1884/In lode da vecciaia
| ←In löde da zoventù | Lunaio zeneize compilao da-o sciô Regiña & C. pe l'anno bizestî 1884 In lode da vecciaia |
Ghe vêu da vernixe→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
-X-
Un vegetto con barba e cavelli
Che son gianchi e pan fîe de lin,
O l’attreûva pe-a stradda de quelli
Che davanti ghe fan mille inchin.
Chi ghe vêu camallâghe o groppetto,
Chi o baston pe no fälo stancä,
Chi se göde de dâghe braççetto,
Chi s’onora de poeìghe parlä.
S’o l'e ommo de scienza e dottrinn-a,
Quand'o conta i sò tempi passæ
Ghe staieìvan lì seïa e mattinn-a
A sentîlo co-a bocca impallæ.
Scinn-a o ræ se ghe lëva o cappello,
O se o porta in carrossa con lê,
O ghe serve da bacco e pûntello
Quando soli passeggian a pê.
S’o l'è ommo ch’o l’aggie famiggia,
Pe-i figgiêu che allegressa! che onô!
Chi l'abbrassa, chi o bäxa, chi o piggia
A ben voeì comm’o foïse o Segnô!
Chi g'appægia di boin bocconetti,
Chi ghe porze o gottin de vin bon,
Chi ghe manda pernixe, öxellettí,
E di pesci che schittan ancon.
A-a mattin sätan zû pe vestïlo,
Chi o despêuggia, chi o mette a dormî,
E con i êuggi vorrieìvan sciorbïlo,
E da-i bäxi de lûngo crovî.
Anche o pöveo troviä dappertûtto
Sofferenza, rispetto, affezion,
E se san ch’o l'è prïvo d’aggiûtto
O l'ottëgne favô, protezion.
O vecciaia da tûtti gradïa,
O vecciaia da tûtti stimmâ,
Chi no dixe che ti ë benëxîa?
Chi no dïxe che ti ë fortûnnâ?