Lunaio Regiña 1884/E lamente de figgie
| ←O canto de leitæe | Lunaio zeneize compilao da-o sciô Regiña & C. pe l'anno bizestî 1884 E lamente de figgie |
In löde da zoventù - cansonetta→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
-)o(-
Tûtti dixan che pupponn-e!
" Che carzêu! Che pestûmmin!
" Pàn Ingleixi! pariginn-e;
" Pàn angiëti e cherûbin!
" San ben lëze.... san ben scrïve...
" San dipinze e recamâ ...
" San sûnnä mille strûmenti....
" Comme libbri san parlâ.... "
Vegnan sempre a dâne a bærta,
E ne gïan sotto i barcoin,
E ne mandan mille bäxi
E dûxento sospiroin.
Missi a-e streìte lì do sacco,
Pe mosträ l’immenso amô,
De sentîne sensa dêutta
Pän imbriæghi!... cangian cô!..
Sciortan fêua con mille scûze;
Ma d’intanto se ne van,
E ne schivan comme a pæsta
Se ne scrêuvan da lontan.
Se preghemmo d’ëse brûtte
E magära rebellæ
Perchè lö c’ún pö de dêutta
Da-i galanti son çerchæ.