Lunaio Regiña 1835/Avviso ae mammè
| ←A borsa | Lunaio zeneize compilao da-o sciô Regiña & C. pe l'anno 1835 de Avizo a-e mamè |
| Zena, Stampaja di Fræ Paghen, Ciaçça Nœuva n. 43 - exemprâ conservao inta Libraja Britannica |
Raxonetta d'un Figiêu da nascion
Faeto Storico
Donne cäe, stæme a sentî,
Che ve conto un pö l’Istoja
Do mæ nasce, vive e muî
Per tegnîvela a memoja.
Son nasciûo in mezo ä fortun-na
Da un-na bella e ricca moæ,
Delicâ, de bon-na lun-na,
E sentimentale assæ.
Êutto meixi e ciù son stæto
Da mi solo ne-a so pansa,
E con lê son sempre andæto
In qualunque circostansa;
Mai de ninte me mancava!
Tutto aveivo sensa fallo,
In carossa; ao Teatro andava,
A ballâ... e finna a cavallo!...
D’ogni cosa che me fesse
Vegni côæ, Mammà meschin-na
Tutt’a voeiva che mi avesse,
Fusse læte de gallin-na!
Finalmente a se dé a pen-na
D’appartôime con gran stento;
Ma de vedde a luxe appen-na,
Meschin mi!... subito ho cento:
Giando i êuggi, me son visto
In te grinfie d’un-na donna
Vegia, affiâ, d’un sguardo tristo,
Che a ciammavan Bon-nadonna;
A m’ammiò, e buttando un crio:
Masccio! masccio! a disse! scialla!
Poi toccandome c’un dio
A me deslogò un-na spalla!..
A me cacciò là in t’un canto,
Ch’ëo ciù neigro che o carbon,
E a me fesse çerto incanto
Con schissâme o scignoron!
Sciortì a mezo un co-i speggietti,
Berrettin con farballà,
Mastugando fenôggietti,
E l’ëa questo mæ Pappà;
O m’ammiò d’in lontananza
Con çert’aja sorprendente...
Tutt’assemme intrò ne-a stansa
Un’infinitæ de gente.
Hò creddûo che m’insordissan
Dä caladda che façeivan,
E che o naso me rompissan,
Perchè tutte tiâ me o voeivan.
Tanto streito me fascion,
Che no poeìvo ciù respiâ....
Testa e collo me ligon,
Che me son sentïo stranguâ!...
Doppo aveìme per mez’öa
Struffuggiôu comme un strasson,
Me porton da un-na Scignôa
Sotto un ricco padiggion;
A doveiva ëse a Mammà,
Che un gran baxo a me cioccò
Fêua da testa, che o Pappà
Con raxon o resättò.
Poi m’han misso in t’un-na chin-na
Per locciâme ogni pittin
C’un-na grossa bûgattin-na
D’êujo e succao per tettin!...
Steì vint’ôe coscì, e creddeìvo
De creppâ da-o gran languî:
Cose hò mai fæto! dixeivo,
Che me fan tanto soffrî!...
Tutto in galla m’han vestio
Per portâme a battezzâ,
Oh che freiddo ho mai pattio!
Me creddeivo de giassâ!...
Cianzeì tanto, che m’arvivo:
Ao ritorno poi m’han dæto
Un potente vomitivo,
Che collâ a forza m’han fæto!
Me fen giâ per tutta a Veggia
Comme un gatto in t’un çestin
A mostrâ pe un-na mäveggia,
E per fâme dî: meschin!
Piccò ä porta finalmente
Un-na pæsta de Paisan-na,
Rossa, e ardìa comme un serpente,
Con medaggia e gran collan-na:
L’è chi a Mamma! tutti crion;
A l’intrò, a bevè e a mangiò,
A lê poi me consegnon,
Che ben lonxi a me portò.
In carossa son partio,
Che testæ a me fè piccâ?...
O Sô in Lion m’hà brustolio
Pe-e montæ c’ho dovûo fâ!...
Me portava un dito o Tatta;
Arrivæ sotto un sujêu,
O ne dè de mi un-na patta
Dove gh’ëa un atro figiêu;
Questo, un so Rampollo o l’ëa,
Che per morto fen passâ!...
De sei meixi, giano in cëa,
Tanto grasso da sccîuppâ.
Ah! mai ciù ghe fusci andæto!
Che compagno g’hò trovôu!
Indiscreto; mâ assuefæto,
Che i mæ drïti o s’ha uzurpôu!...
Mi cianzeivo, e lê tettava,
E fin ch’o n’aveìva vêuggia,
Tutto o læte lê piggiava,
E mi incangio un pö de schêuggia!
Questo è ninte, mi dormiva
In ta paggia, e lê in te ciûmme!
Lê respiava un’aja viva,
E mi suffucôu da-o fûmme!...
Questo è ninte!... oh çerte moæ,
Ricche e povee senza coêu,
Che a de Mamme abbrettio dæ
I meschin vostri Figgiêu,
Stæ a sentî, imparæ, e stordî!
Un-na nêutte, questa Stria
A me fè con lê dormî,
E son morto d’asfixìa!!!
No cianzeì però a mæ morte,
Nè de mi aggiæ compascion,
Perchè a ciammo anzi un-na sorte,
Staggo assæ ben dove son.