La donna è mobile
“La donna
è mobile„
SEENADA SPEZINA
de
u. mazzini
la spezia
1902
Tip. Francesco Zappa
Via Duca di Genova
Lü: Bela me’ fante caa,
Raìze der me’ chèe,
Vegni ’n po’ zü pea scaa,
Fame ’n po’ sto piazée;
Vegni, ch’a vogio dite
Quant’a te vogio ben,
Ch’a voi contate e fite
Che me dà ’r chèe chì ’n sen...
Vegni, ch’a vogio date
En bazo aa moeschina,
Ch’a vogio ’n po’ strissate
A masca berechina;
Vegni, perché a ne posso
Vive lüntan da te,
E a son deventà n’osso
Ch’a ne me pao ciü’ me.
Se l’è de giorno, a peno
Daa smania ch’ho chì ’n peto;.
De note a m’aremeno
Sempre desvegio ’n leto;
E ho sempre chì davanti
Quei dôi te’ bei ocion,
Ch’i lüzo, e i pao diamanti,
Ch’i foo, e i pao spincion.
E te ne te m’è manco
Pea cassa der penseo...!
A o so ch’a ne son gianco,
A o so ch’a ne son beo!
Ma ’n sen a gh’ho ’n tresoo
D’amoe, che me a n’o so
Se tanto la vaa l’oo
Che lüza soto ao sô!
E aloa perchè te tasi?
Perchè te ne m’arevi?
L’è n’oa ch’aspeto, o squasi,
E te te ne te smevi.
Donca a me ’n devo propio
Andae cossì avilì?
Per me ne gh’è ciü’ scopio?
Tüto l’è ’nzà fenì?
Va ben! aloa a me ’n vago...
Ma de sto cavagneto
Oamai de cos’a ’n fago?
A roba ond’a la meto?
Drento gh’è dôi regali
Ch’i eo destinà per te....
A chi è ch’a devo dali
Se te ne t’i m’i vè?
Gh’è giüsto na torteta
Con sorve a marmelata....
A n’ho sazà na feta,
L’è propio delicata;
Gh’è ’n tagio d’endïana
Per fàteghe ’n scozà,
En casachin de lana
Coi bordi arecamà;
Gh’è ’n beo mandilo zalo
Con tüti i se’ fiocheti,
Gh’è ’n resto de coalo,
En fero dai risseti,
N’anelin d’oo.... Ma tanto
Te te ne me vè ciü’.....!
Adio! m’anega o cianto....
Le: - Fa fito, vegni sü!