 |
Questa pagina a l'è stæta corretta. | |
E aloa perchè te tasi?
Perchè te ne m’arevi?
L’è n’oa ch’aspeto, o squasi,
E te te ne te smevi.
Donca a me ’n devo propio
Andae cossì avilì?
Per me ne gh’è ciü’ scopio?
Tüto l’è ’nzà fenì?
Va ben! aloa a me ’n vago...
Ma de sto cavagneto
Oamai de cos’a ’n fago?
A roba ond’a la meto?
Drento gh’è dôi regali
Ch’i eo destinà per te....
A chi è ch’a devo dali
Se te ne t’i m’i vè?
Gh’è giüsto na torteta
Con sorve a marmelata....
A n’ho sazà na feta,
L’è propio delicata;
Gh’è ’n tagio d’endïana
Per fàteghe ’n scozà,
En casachin de lana
Coi bordi arecamà;
Gh’è ’n beo mandilo zalo
Con tüti i se’ fiocheti,
Gh’è ’n resto de coalo,
En fero dai risseti,
N’anelin d’oo.... Ma tanto
Te te ne me vè ciü’.....!
Adio! m’anega o cianto....
Le: - Fa fito, vegni sü!
