Lûnäio zeneize 1932/A-o de là?!
| ←Comme a l'andiâ a finî? | Lûnäio zeneize pe l'Anno bisesto 1932 de A-o de là?! |
A-i nostri tempi→ |
...
...
poi... no sò dî o perchè — forsatamente
ho serrôu o libbro... me sentivo a testa
che a paiva ûnn-a cädea d'ægua boggente....
e son restôu coscì, comme se resta
sbalordii se da-i pê ve picca ûn tron,
che no s'è vivi e morti no s'è ancon...
Sentivo che a mæ vitta a se n'andava
a poco a poco, mentre che o çervello
paiva o me se fondesse, comme a lava...
Intorno a mì, se gh'ëa formôu 'n'anello
de nebbia iridescente, profumâ
d'ûn ödô grato, ma che o fâva mâ...
e voeivo serrâ i œuggi; abbandoname,
in te quello torpô, completamente,
quando m'è parso de sentî baxâme
da quattro o çinque bocche döçemente
ma coscì soave, e con affetto tale
che non ho mai provôu ûn bäxo eguale.
Çerto ch'ëan baxi d'àngei... baxi santi
de quelli che se scangian tra de lô,
baxi che contegnivan tûtti quanti
i gödimenti che pœu dâ l'amô...
ma coscì casti, coscì appascionnæ...
quæxi ciù bòin... che i baxi de mæ moæ!!
L'anello nebuloso o se sformava
in mille moddi, con mille colori,
teste, gruppi de donne o delineava
stofe, laghi, giardin, mazzi de fiori
in te ûn'orgia de lûxe coscì forte,
coscì inebriante... che a m'ha dæto a morte.
E mentre che o mæ corpo, inanimôu
o cazzeiva pe tæra, gravemente,
me son sentïo in to spazio sollevôu,
me son sentïo abbraççâ, soavemente,
da de braççe invixibili e portâ
verso ûnn-a stella, che co-o sò brillâ
vivo, de lûxe intensa, fiammeggiante,
a m'ipnotizza, attirandome a lê....
a l'è a ciù bella!... — e scì che ghe n'è tante
de stelle belle semenæ pe-o Çê! —
tante che me pâ un scrigno de brillanti
d'attraversâ, con i sò cöî cangianti.
Oh! comme vaddo presto, comme xœu[o]
sens'äe pe l'infinito firmamento!...
no m'accorzo davveì d'ëse in to vœu[o],
l'è ûn secolo che o fasso, ò l'è ûn momento?!
Quanta bellezza! quanta paxe in gïo
tanto piaxèi mi no l'ho mai sentìo!
che abbarbaggio de lûxe, che splendô!...
Traverso ûn mâ de fœugo relûxente,
ma... comme o l'è mai freido!... o no l'è o Sô
quello dove me trœuvo... çertamente....
e me sento de lûngo ciù leggiero,
ormai de mi no resta che o pensiero!
Comme o fûmme che o sciorte da-o camin,
o s'eleva diretto verso o Çê
e o s'allarga, dappoi, cianin, cianin,
coscì son mì... lasciandome inderrê
a tæra, me sentivo ben diverso,
ëo ûn atomo!... e abbraçço l'Universo!
Unn-a vampa, ûnn-a fiamma incandescente
a m'investe e a distrûgge tûtto quello
che m'è restôu d'ûmano,... inconsciamente
son trascinôu, me spuncian... e lì ûn novello
spettacolo, maëstoso, pin de incanti
all'improvviso o me se fà davanti,
Grosci erböi strani, con fiori brillanti
comme foïsan de perle, de rubin,
de zaffiri, topazi e de diamanti,
pe ûnn-a lunga desteisa, senza fin
tra ûnn-a soave, döçe melodia
tale che in tæra a no è mai existia.
E in te questa bellezza, comme ûn'onda
de forme indefinìe, diafane, gianche
a me se strenze addosso, a me circonda,
pâ che ûnn-a man energica a m'abbranche,
e me sento cacciâ drento a ûn laghetto...
me pâ d'ëse — sciortindone — perfetto!!
Eì mai provôu — de Mazzo — quando o vento
o spira leggermente in mëzo a-e ramme
che pâ che o cante; o che comme ûn lamento
in sce a spiaggia do mâ pâ che o ve ciamme:
l'eì provôu quello çerto non sò che
che o ve fa cianze, e no ne seì perchè?...
Coscì mi allöa ho provôu tanta imprescion
a-o sentimento nœuvo che m'offriva
questa mæ bella e nœuva condizion
che invece de gödine ne soffriva
ma d'ûn spaximo tanto delizioso
che o vaïva o gödimento ciù prezioso.
Poi, d'improvviso solo son restôu
in mëzo a ûn spazio semenôu de fiori
tûtto completamente circondôu
de mille fiamme, de mille colori
che s'agitavan con o movimento
proprio da fiamma flagellâ da-o vento.
Unn-a per ûnn-a me s'avvixinavan
senza toccâ pe-a tæra, adaxo adaxo
me passavan dappresso, me sfioravan,
con l'imprescion che me se desse ûn baxo,
e questa assæ piaxevole demöa.
a l'è dûâ forse ûn anno, forse ûn'öa.
O bello o l'è che mentre a no stancava
me ne sentivo, invece, insoddisfæto
perchè quarcösa dentro a mi mancava...
Senza savèilo, me sentivo attræto
da ûnn-a bella fiammetta gianca, gianca,
che a se cegava, comme a foïse stanca;
ma quande, comme e ätre, a s'è mesciâ
pe vegnîme dappresso, m'ha acciappôu
ûn tremô tale che... ve o poeì figûâ...
me sentivo incapaçe, soggiogôu
aveivo solamente ûnn-a voentæ:
che quella fiammettinn-a a foise a mæ!
Lê ascì a tremava tûtta, meschinetta
vegnindo verso mì, sottî, piccinn-a,
mobile, agitatiscima, ma netta,
ma coscì pûra, trasparente e finn-a
e in te tûtte e sò parti coscì bella
che — ciù che fiamma — a poeiva dïse stella!
Quando a m'è vegnûa a päo, me son sentìo
comme investìo de ûnn-a segonda vitta,
incontro ghe son sûbito corrïo
comme se a fosse stæta calamitta
e appenn-a appenn-a se semmo scontræ
ûn dentro l'âtro semmo penetræ...
. . . . . . . . . . . .
Questa mâveggia intanto a se compiva,
ne-a stessa forma, ininterrottamente,
chi ëa cacciòu dentro a-o lago, o ne sciortiva
pe incorporâ ûnn-a fiamma immantinente
e quella massa de fiamme animæ
in poco tempo a l'è restâ a meitæ!
A gruppi ûn doppo l'ätro, verso ûn Çê
d'öu fûso e de rûbin, se sollevemmo,
o pâ ûn volo de grû... son inderrê:
ma posso dîlo: son? devo dî semmo
perchè doppo l'affare da fiammella
no son ciù solo, ho l'anima gemella!
l'ätra parte de mì dentro de mi —
che de due fiamme se n'è fæto ûnn-a —
quanta feliçitæ d'ëse coscì
fûsi in te ûn solo essere! nisciûnn-a
mente pœu immaginâ quello che prœuvo
in te questo mæ stato, strano e nœuvo!
Comme ûn volo de grû... (no o no l'è esatto
o paragon, doveivo invece dî
comme un incandescente razzo-matto
sfolgorante de luxe, zimme e cöî)
se n'andemmo pe l'aïa risplendente
co-e spire de ûn lunghiscimo serpente.
E vanni, e vanni, e vanni, a poco a poco
e fiammelle s'ammortan ma ghe resta
ûnn-a scìa lûminosa, fæta a cresta
che a va a formâ de fûmme ûn vello fiöco:
i gruppi se destaccan, se riuniscian
finchè completamente scompariscian.
Aöa no gh'è ciù ninte, no se vedde
ciù ninte in gïo, soltanto l'infinito
firmamento. Chi mai porrieiva credde
a ûn semplice e coscì sublime rito?
doppo ëse stæto fiamma, nebbia e vento
aöa son tûtto e ninte! e son contento!
O no se vedde, no; pûre se sente
che o spazio tûtto quanto o l'è animôu
o l'è tûtto de stelle risplendente
de ûn profummo inebriante imbalsamôu
e nöî, comme se foiscimo abbraççæ,
stemmo gödindo a vëa feliçitæ!
Da quanto tempo? mah! chi o pœu contâ
o tempo che trascore a 'sta manëa,
me sento lievemente trasportâ
da ûn mondo a l'ätro e non ho ciù l'idea
de tempo e spazio... son feliçe tanto
quanto o pœu ëse in Paradiso, un santo!
Dentro l'äia che in tæra se respìa
impalpabile fluido aöa me trœuvo
a mæ miscion sento che a l'è finìa,
che devo trovâ torna ûn corpo nœuvo,
vaddo dunque çercando l'öcaxion
pe dâ vitta a ûn ätro ëse... ma ciù bòn!
. . . . . . . . . . .
L'è d'arvî... l'è rinata a primmaveia,
bella e galiöta con tûtti i sò incanti
l'öcaxion a no manca... cazze a seìa...
in te ûn giardin passeggian döî amanti...
e mi - cö ciù sublime di piaxeì
me fondo drento a ûn baxo de sposoeì.
........................................
NOTTA.
Quanto de vëo ghe segge in tûtto questo
in mæ zûamento no ve-o posso dî,
son stæto in letto, m'han spacciôu pe lesto
credeivan che no poëse ciù sciortî
con e mæ gambe, ma voëndo Dio,
benchè ûn pô rotto, pe aöa son guarìo.
Che me l'agge assûnnâ, che a segge vëa
questa trasformaziòn che v'ho contôu
v'assegûo che mi a faïva voentèa,
perchè finî in te ûn baxo appascionôu
sorva ûnn-a bella bocca, mai baxâ,
comme epilogo, via, no ghe sæ mâ!
Quarchedun ha osservôu che questo travaggio o по l'è scrïto in puro zeneize. L'è vëo ma bezœgna consciderâ che de giorno in giorno o dialetto o se italianizza, e allöa?..
.jpg) |
Tûtte e vòtte che vegne a Madonnâ |