L'Evangeliu segundu Mattê/cap. XXVIII
| ←cap. XXVII | L'Evangeliu segundu Mattê de cap. XXVIII |
endexu→ |
ESSENDU zà avansâ a neutte du sabbu, a u spuntâ du primmu giurnu da settimanha, Maria Maddalena e l’âtra Maria sun andæte a vedde u sepulcru.
2 E eccu l’è stætu ün gran terremotu ; perchè l’angëu du Segnû u l’è disceizu da u sê, e accustanduse u l’ha vurtòu a pria, e u ghe stava assettòu addossu.
3 A so faccia a l’ea cumme ün lampu, e u so vestimentu cumme a neive.
4 E per puia de lê ê guardie se sun spaventæ, e sun restæ cumme morte. 5 Мa l’angëu du Segnû parlandu u l’ha ditu a ê donne: vuiâtre n’aggeì puia, perchè mi so che serchæ Gesü che u l’è stætu missu in cruxe.
6 U nun è chì; perchè u l’è resciüscitòu cumme u l’ha ditu. Vegnî, e amiæ u leugu duve l’è stætu missu u Segnû.
7 Е andæ sübitu, e dî a i so discepuli cu l’è resciüscitòu, e eccu u ve va avanti in Galilea; là u vedieì. Eccu mi v’ho prevegnüu.
8 E sübitu sun sciurtìe da u sepulcru cun puia e grande allegressa, caminandu a dâne neuva a i discepuli.
9 E eccu Gesü u gh’è andætu incuntru dixendu: ve salüu; e lu se sun accustæ, g’han abbrassòu i pê e l’han adoròu.
10 Allùa Gesü u g’ha ditu: n’aggeì puia, andæ, avvisæ i mæ fræ che vaddan in Galilea: là me vediàn.
11 Quelle essendu andæte via, quarcünha dê guardie l’è vegnüa in sittæ, e a l’ha raccuntòu a i prinsipi di sacerdoti tüttu quellu che ea successu.
12 E essenduse radünae cun i ansien e fætu cunseggiu, han dætu multi dinæ a i surdatti
13 Dixendu: dî, i so discepuli sun vegnüi de neutte, e l’han arobòu mentre durmivimu. 14 E se questu u vegnià a ê uegge du guvernòu, nuì u persuadiemu, e ve mettiemu a u cuværtu.
15 E quelli piggiæ i dinæ, han fætu cumme gh'ea stætu insegnòu, e questa vuxe a s’è divulgâ fra i Giüddei scin â giurnâ d’ancheu.
16 Mai ünze discepuli sun andæti in Galilea ne u munte duve Gesü u gh’aveiva cumandòu.
17 E avendulu vistu, l’han adoròu; ma quarcün ha dübitòu.
18 E Gesü accustanduse u g’ha parlòu dixendu: m’è stætu dætu qualunque facultæ in sê e in tæra.
19 Andæ dunque, instruî tütti i populi, battezzanduli in numme du Puæ, du Figgiu, e du Spiritu santu:
20 Insegnandughe d’оsservâ tütte ê cose che v’ho cumandòu; e eccu che mi sun cun vuiâtri in tütti i giurni scin â fin du mundu.