Esopo Zeneize 1822/O Gallo, a Vorpe, e o Can
| ←O Moscon | Esopo Zeneize de O Gallo, a Vorpe, e o Can |
I dui Vegi→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Gallo, a Vorpe, e o Can.
Un Galletto insemme a un Can
Fen un viaggio per Milan;
Verso seja se fermon
Per dormî, ma no mangion;
Montò o Gallo sorve un Pin,
E de sotto stè o Barbin;
Ma in ta nêutte ne-o sentî
Fâ ogni pö chichirichî:
O l'è o Gallo, disse affiandose
Un-na Vorpe, e perleccandose
A l’andò ciannin ciannin
Sotto quello erboo de Pin:
(A ghe disse): O to cantâ,
Bello Gallo, o m’hà incantôu;
Chin-na zù, t'êuggio baxâ[1]
Vorpe caa, son chi serrôu
(Ghe rispose o Gallo) adescia
O portê, chi è sotto o Pin,
Perchè o m’arve .... Quella nescia
A o ciammò, sciortì o Barbin,
Che in t’un attimo o a scannò,
E o compagno o liberò.
No besêugna mai dâ mente
A-o parlâ de çerta gente,
Tanto ciù quando ve dan
Dell’incenzo, perchè o fan
Comme a Vorpe pe' ingannâ,
Nè besêugna all’occaxon
Mai lasciâse spaventâ
Da chi è forte, e mascarson;
Ma politica ghe vêu,
E mostrâ d’avei do coêu,
E besêugna l'arte usâ
Pe' ingannâ chi vêu ingannâ.[2]