Esopo Zeneize 1822/L'Erboo d'Amandoa, e l'Erboo de Figo

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
L'Erboo d'Amandoa, e l'Erboo de Figo
Zena, Stampaja Pagan, 1822 - Primma ediçion
e en stæti reixi con êu e ôu.
In notta e diferençe co' l'ediçion do 1846.


[p. 36 modifica]
FOA XX.

L'Erboo d’Amandoa, e l'Erboo de Figo.


A-o spuntâ da Primmaveîa,[1]
Unn’Amandoa in t’un giardin
A l'ea tutta bella sciuîa,[2]
Gianca comme un armellin;

Con superbia a se vantava,
Mincionando un Briggiasotto,
Perchè nûo do tutto, appen-na
O cacciava qualche brotto;

Ma un-na nêutte fesse un freido
Così[3] forte, che giassò,
E all’Amandoa tutte a reo
E so sciuette ghe crovò.

Passò a Stæ, vegnì l’Autûnno,
Bello vedde o Briggiasotto
Pin de fighe lagrimose
Co-a camixa, e o collo rotto,

[p. 37 modifica]

Chi se vorta ä so vexin-na,
E ghe dixe con raxon:
Dove son tutte e to scioette,
E to amandoe dove son?

Ah! per bacco! che a to gloria
Presto in fûmme a se n’andò,
Ti n’æ manco ciù de fêuggie,
Vegni chì, che te croviò.

Non se deve mai vantâ
D’ese ricco e ben vestïo,
Nè chi è poveo mincionnâ,
Perchè tutto ven da Dio,
Un chi è ricco anchêu, doman
O porrieiva porze a man.

  1. Primmaveja
  2. scioïa
  3. Coscì